Ariba dia 9 di november 2023 Fundacion Telefon pa Hubentud Aruba a lansa su logo nobo. Un logo cu ta ilustra tur e servicionan cu Fundacion Telefon pa Hubentud Aruba ta brinda na e muchanan, hobennan y adolescentenan di Aruba.
Fundacion Telefon pa Hubentud Aruba ta den e proceso di prepara e organisacion pa e siguiente 25 aña. Cambio di e logo ta un di instrumentonan den e proceso aki. Otro instrumento ta e website di Fundacion Telefon pa Hubentud Aruba cu ta 131.aw.
Fundacion Telefon pa Hubentud Aruba a ser funda ariba e Tratado Internacional di Derecho di Mucha. Articulo 17 di e Tratado ta bisa cu tur mucha tin e derecho di tin acceso na informacion for di diferente fuente, manera buki, television, corant of internet. E informacion mester ta interesante pa nan y nan mester por siña di dje. Tambe mester tene cuenta cu e diferente idiomanan y cultura di muchanan c uta biba den e pais concerni.
Na momento cu un mucha/ hoben tuma contacto cu un di e servicionan di Fundacion Telefon pa Hubentud Aruba, e mucha/ hoben mes ta scoge e idioma cu e kier comunica. Na 2019 na momento di a lansa 131.aw, 131.aw a ser desaroya den e idiomanan Papiamento y Ingles. Awor a yega e momento pa añadi e idiomanan Hulandes y Spaño acerca.
Desde awor, na momento cu e mucha/ hoben haci uzo di e 131.aw pa busca/ ricibi informacion, e mes por kies den cua di e idioma e kier ricibi e informacion. Esaki ta sigura cu mas mucha/ hoben lo haci uzo di e informacion cu nan mester den e idioma di nan preferencia.
Telefon pa Hubentud 131 kier a gradici su diferente partnernan cu ta tuma nan impacto social na serio y ta inverti den e muchanan y hobenan. Un gradicimento ta bay na e.o. Setar N.V., Aruba Airport Authority N.V., Web Aruba N.V., RBC Royal Bank (Aruba), DOW y The Movies Aruba pa nan colaboracion den e proyecto aki.
Pa mas informacion tocante 131.aw por tuma contacto cu Fundacion Telefon pa Hubentud Aruba via nos facebook: https://www.facebook.com/telefon.hubentud/, email: [email protected] of telefon 5886138/ 5884011.
