Diasabra ultimo den e ya mundialmente famoso Domino Square Garden na Calabas, esta 99 Bar & Restaurant, un suseso a pasa cu ni e team di Alemania y ni Hollywood lo kere cu por ta posibel! Sinembargo, bou guia di e mente strategico di Dr. Han mester admiti cu “wat Han kan, kan Han alleen”!!
E conosido trabuconan di Madiki Kavel a bin e famoso Domino Square Garden na Calabas/Kudawecha pa enfrenta e team di cas, esta Team 99 di 99 Bar & Restaurant. Cu bela yen Madiki a cuminsa suta piedra bay off man’e cu no lo tin mayan! Den un frega di wowo half time a bati y Madiki ta dilanti cu score impresionante di 11-6!! Despues di un bon pauze caminda publico y hungado por a goza di e eskisito snacks nan di Han, e “massacre” di Team 99 por a continua. BLAM-BLAM-BLAM piedra ta bati mesa y sensacionalmente Madiki Kavel ta dilanti cu score di 17-11!!
Un harimento, un cherchemento, un celebracion di otro mundo den militancia di Madiki! Nan ta bende cuero di bina mientras cu solo no a baha ainda! Den skina doño di luga ta hari so y ta kinipi wowo cu nada menos cu Dr. Dirksz bisando esaki “los e torpedo numa…release the beast!!”.
Basta hunta manteca na boca di pushi! Negoshi a draai bon y “It’s time to separate the men from the boys!”. Dr. Han ta los e sicarionan…BOEM 17-12…BLAM-BLAM 17-13…hesuseee…17-14….wanta duro…17-15….e ta hasi dolor?…un tiki so…17-16…y finalmente Madiki Kavel ta sinti e “prikkie” ora sensacionalmente Team 99 ta empata na 18-18!! E conosido Betto “cas hende” lo drenta buki di historia awo como “Betto bolter mesa”, ora cu ora di gana su wega e ta bolter mesa! Sinembargo kico pa conta? Tur piedra a spart y wega mester wordo hunga di nobo y awo ta Team 99 ta gana! E rabo di porco ta bezig ta krul shonnan na un manera nunca bisto!
Team Madiki Kavel ta tembla manera lagadishi cu a haya piedra di stichi! Ainda nan ta kremencha un punto mas, pero Fayong cu Tinchi tin e señanan di Madiki bon studia y ta mand’e score pa 20-19, y na final Dr. Dirksz, kende hunto cu grandmaster Yoyo ya tin 6 wega gana caba, ta pone Madiki bira Ma’fini cu e comeback di ciglo, ganando cu score di 21-19!! Euforia y histeria total cerca Team 99 y su fanaticada, y ta manera Dolf ta bisa “we don’t come from behind, we attack from behind”!! Shonnan keda pendiente pasobra t’awo tin co’ n’e unico Domino Square Garden na mundo, 99 Bar & Restaurant na Calabas/Kudawecha!
