Na momento cu e caso penal contra asesino di Sayuri a finalisa, tata di e victima, Mike Petronia pafo a duna un declaracion na 24ora.com. Aki el a cuminsa pa pidi su disculpa na hues y otronan pa su actitud paden den sala di corte.
Paden Mike Petronia a perde pasenshi cu e abogado di e acusado Izak Principaal y a bis’e “bo ta gaña. Unabes cu bo saca un arma y pone na cabes di un persona, ta mata bo kier mata. Y mi ta bay tambe”.
Funcionarionan di CEA a sac’e pafo te ora cu el a calma y e por a drenta bek paden. E momento ey e tabata mas calma, pero su cara tabata mustra visiblemente irita cu e situacion. Eynan caba el a haci un señal di pidi disculpa direccion di e hues.
Den un declaracion duna pafo tambe el a pidi su disculpa pa a perde pasenshi y a ripiti su frase cu el a expresa paden. Y reitera cu no tabata pa un eror su yiu a perde su bida.