Actualmente Paradise Strenght Aruba ta den preparacion pa un competencia cu ta tuma luga na augustus, den e competencia di Powerlifting.
Segun coach Jonathan Wever, nan ta bayendo cu un atleta cu a representa Aruba den 2019, unda cu el a logra gana medayanan di plata y brons den e dos divisionnan cu el a competi.
Den 2020 no tabatin competencia debi na e pandemia y aworaki den 2021 si tin. Ta preparando dos atleta e biaha aki. Un biaha mas Jason Li, cu a bay den 2019 hunto cu su training partner Christian Saladin pa e competencia di 2021.
Competencianan asina tin su gasto cu ne. Ta pa e motibo aki ta haciendo un recaudamento di fondo entre e propio miembronan di e club di entrenamento y tambe acercando instancia priva y negoshinan pa por yuda cu sponsor.
Loke ta buscando ta algo hopi simpel. Ta buscando pa cera e placa pa asina por cubri e gastonan pa bay. Inicialmente e idea ta pa bay cu e dos atletanan aki hunto cu coach y e representante di e federacion.
Mirando cu no tin mucho competencia internacional pa loke ta powerlifting cu Aruba ta participa, ora tin e eventonan aki, ta importante pa e representante di e federacion bay, pa asina tambe por bay e reunionnan cu tin cu e representante di e federacionnan local, mirando cu ta un competencia regional cu ta afilia na e federacion internacional cu ta IPF (International Powerlifting Federation).
Ta purba di bay cu cuater persona, pa un siman largo. Ta pa e motibo ey mes kier purba pa cubri e gastonan di vuelo, hotel, cuminda y transporte.
Pa aporta tin dos manera. E prome por bin na Paradise Strenght Aruba, cu ta situa den Body Fitness Gym and Nutrition, den e edificio di Kong Hing banda di Crown parti patras.
Por pasa cerca Jonathan Wever ta recauda fondo pa e atletanan. Tambe por tuma contacto riba Instagram @Paradise Strenght Aruba, manera un mensahe caminda cu por pasa e cuenta di banco of palabra pa por haci e donacion.
Pa mas detaye lesa matutino TREMPAN.
