Kico un casita, vuurtoren, tienda di mangel y cos di hunga tin di haber cu un compania di awa y energia? Esey comunidad lo por haña sa diasabra awor, 24 di november. Desde 7.30 or di anochi WEB Aruba ta inaugura e mini pueblo di luz na entrada principal di WEB na Balashi. Asina e compania ta duna inicio na e temporada di fin di aña. Comunidad henter ta invita pa join.
Adorno di luz durante fin di aña ta un aspecto cultural di nos isla cu ta hopi aprecia pa comunidad. E aña aki e grupo di empleado di WEB encarga, a scoge e tema di un ‘mini pueblo’ segun e concepto ‘village’. Muchanan lo por sinta den slee y saca potret. Gaita Las Unicas lo percura pa e ambiente musical entre 8 or y 10 or di anochi.
Esaki ta un oportunidad pa tin un gran celebracion familiar cu canticanan tipico di pasco den un ambiente navideño di luz y hopi color. Pa mas informacion of posibel pregunta por referi na WEB Aruba su pagina di Facebook.
