Lori Simmons tin como 40 aña trahando na Migracion di Aruba, pero desde siman pasa e no ta bonbini mas. A desactiva su badge, despues cu a bin un rapport di Servicio di Inteligencia di Aruba (VDA) den cual ta cuestiona su integridad. Como tal minister a hay’e ta kita e status di confiansa cu e hefe tabata gosa di dje. Un que otro tin di haber cu un “veiligheidsonderzoek” cu a sali malo pa e empleada cu ta cerca di baha cu pensioen.
Simmons, cu ta casa di ex-polis Peter Simmons, ta encarga mescos cu otro pa atende cu frontera na entrada oficial di nos isla. Awor aki e no mag di yega aeropuerto mas pa eherce su trabou. E no ta suspendi. A indic’e cu e por por bay traha na oficina di Migracion situa riba Vondellaan pero e no kier y como tal el a prefera di tuma vakantie.
Mester menciona cu den pasado caba a mand’e bay traha na waf. A haci un investigacion contra dje na aña 2017 cu a sali malo y di forma disciplinario a bah’e den rango como castigo.
Pa loke ta trata e investigacion di inteligencia, na momento cu a entreg’e e rapport final, el a opta pa haci uzo di su derecho pa apela contenido di e rapport. Esey ta un posibilidad den ley. Consecuentemente un hues imparcial lo trata contenido di e rapport, lo repasa e investigacion y locual a sali afo y duna un opinion riba dje. Esey lo sosode e siman aki ainda, pa mira si Veiligheidsdienst Aruba por a faya den nan investigacion of si berdad e empleado publico ta carece di integridad pa e por mantene su funcion.
Di otro banda mester menciona cu na trabou e ta hopi aprecia pa su coleganan cu na e momentonan aki ta hopi desapunta cu e accion cu a bolbe tuma contra Lori Simmons. Hasta tin disgusto den Migracion Aruba pasobra a papia entre coleganan di pone trabou plat.
