Famia Maduro a keda sorprendi pa e declaracionnan di Maria Werleman di Lagabena, relaciona cu nan tereno propiedad cu nan ta cobando pa 12 aña caba. Awor diripiente e cobamento a bira un problema pe ciudadano aki, cu pa colmo ta famia di e herederonan Maduro. E trabounan di cobamento ta aporta na economia di Aruba, e placa ta keda lora riba nos isla mes y na mes momento ta soluciona un reto di material di construccion cu ta den hopi demanda awo cu na varios area no ta permiti pa cobra mas pa saca santo.
Un di e nietonan, encarga cu maneho di e tereno aki a conta nos cu su welo a cumpra e tereno aki na aña 1956 pero a fayece na aña 2006, lagando debe di grondbelasting atras. E herederonan a pensa con pa haci algo pa por haya entrada pa cubri e debenan di impuesto pasobra e tereno ta grandi.
Asina e herederonan a dicidi di explota e tereno pa saca santo y pa traha material di construccion. Na tur e tereno ta midi algo mas cu 67.000 meter cuadra. Asina mes, ora a pone penchinan necesario pa marca nan tereno, a nota cu ta 64 mil meter cuadra nan tin y cu Parke Nacional Arikok a bay cu riba 3 mil meter cuadra di nan tereno propiedad (eigendom).
E tereno ta situa na rand di Parke Nacional Arikok y San Fuego. Desde aña 2007 a cuminsa cu trabou di cobamento den forma mas chikito pero na aña 2012 ora cu DIP a bisa nan cu nan por haci locual nan kier riba e tereno pasobra e ta “eigendom”, a intensiva e trabounan di cobamento di santo.
Ultimo dos añanan ta trahando hunto cu e compania Fatamorgana Excavations and Stone Work. E santo cu ta saca for di e tereno ta bay pa uzo na NV Elmar, Setar, DOW y hasta Mota Engil cu ta trahando Watty Vos Boulevard. Mas cu esey varios compania di construccion trahando cas ta busca santo di eynan mes.
