Aña pasa a anuncia e prome klas pa e trayecto di formacion social pa hende muhe na Aruba. Esaki tabata un momento cu sigur lo keda marca den historia di Aruba, un cooperacion entre Marinierskazerne y defensa di pais Aruba pa realisa e trayecto pa hende muhe.
E aña aki atrobe a habri inscripcion pa un dis dos grupo femenino completa e trayecto aki. Jessica Ras, coordinador di Formacion Social a conta cu inscripcion a habri caba y tur hoben femenino di 18 aña te cu 25 aña por inscribi y tambe mester padece sea un paspoort Hulandes of un permiso valido. Esey ta pues e rekisitonan pa por participa den e programa.
Ras a splica cu esaki ta algo completamente boluntario aunke tin biaha tin mayor ta obliga nan yiunan di participa den esaki, pero na final toch e hoben mester kier haci e trayecto ya cu e mester cumpli cu palabracion y e disciplina cu ta rekeri den e programa. Tambe el a splica cu e trayecto pa hende muhe ta igual na esun di hende homber, cuminsando cu un fase di cuater luna y esaki ta e parti estilo militar, cu ehercicio militar corespondiente.
Aña pasa e interes tabata significante, pero asina a opta pa cuminsa cu un grupo chikito di diescuater hoben femenino y na final un total di ocho hoben a completa esaki. Tabatin motivacion den e grupo sigur, pero tambe poco nervio y miedo ya cu esaki tabata algo nobo, hasta pa e coordinadornan. Sinembargo, cu bon preparacion y siguiendo diferente curso pa traha cu e ser femenino a logra haci esaki exitosamente.
