Super Food Plaza Cares Program recientemente a haci entrega di un cheque na valor di Afl. 54.302,49 na Fundacion Ban Uni Man Pa Cria Nos Muchanan. E suma aki ta un record nobo alcanza pa e programa den un luna di tempo.
E cheque a ser otorga pa marketing manager di Super Food Plaza, Sr. Rudy Richardson y a ser ricibi pa Sr. John Fun y demas miembronan di e fundacion. E fundacion ta percura pa casi 700 alumno di menos recurso cu ta atende scolnan basico y secundario ricibi un desayuno tur dia di scol. E alumnonan mester pasa un screening prome pa verifica cu e famia ta den necesidad.
Directiva di Fundacion Ban Uni Man Pa Cria Nos Muchanan ta masha agradecido na clientenan di Super Food Plaza cu a contribui, pasobra cu e donacion aki, nan por percura pa mas cu 100 alumno sigui ricibi un desayuno pa un anja largo.
Cu un donacion chikito di Afl. 1.75 of mas, e cliente por participa den un raffle semanal pa e chens di gana un gift card na valor di Afl. 250, Afl. 500 of Afl. 1.000. E sorteo ta tuma lugar tur dialuna. Den luna di oktober, cu ta Breast Cancer Awareness month, ta toca turno na Mary Joan Foundation pa nos yuda recauda fondo p’e. E fundacion aki tin como meta pa duna servicionan di sosten y ayudo y pa inspira speranza den esnan cu ta sufri di cancer di pecho.
Tambe nan ta concientiza comunidad ariba metodonan di examinacion propio y programanan disponibel pa deteccion tempran di e malesa. Clientenan di Super Food Plaza ta keda invita pa sigui sostene e Super Food Plaza Cares Program y asina yuda Mary Joan Foundation cu nan meta importante pa nos comunidad.
