Recientemente Super Food Plaza Cares Program a haci entrega di un cheque na valor di Afl. 43,636.08 na United Dogs Aruba Foundation.
E fundacion a keda masha agradeci cu e donacion como cu e luna aki nan ta organizando nan campanja anual di sterilizacion di animalnan di caya. E mision di United Dogs Aruba Foundation ta pa crea un mihor futuro pa e bestianan di caya na Aruba por medio di maneho humano di e populacion. Danki na e donacion aki, cu a ser haci posibel pa e clientenan di Super Food Plaza, awor nan por logra steriliza mas animalnan di caya pa asina e populacion stop di crece asina rapido. United Dogs ta traha hunto cu e otro fundacionan local tambe pa logra nan meta.
Den luna di September ta toca turno na Fundacion Ban Uni Man Pa Cria Nos Muchanan pa nos yuda recauda fondo p’e. E fundacion aki ta existi pa mas cu 18 anja caba y tin como meta pa percura pa muchanan di menos recurso ricibi un desayuno tur mainta na scol. Nan ta haci esaki tanto na scolnan basico como scolnan secundario. Na e momentonan aki, mas cu 600 mucha ta ricibi nan pan y bebida tur dia na scol por medio di e fundacion aki. Famianan ta pasa un screening prome cu e mucha por ricibi desayuno for di e fundacion. Un mucha cu come desayuno por studia mihor na scol y asina por logra yega mas leu den bida cu un mucha cu bai scol cu hamber.
Tur luna e Super Food Plaza Cares Program ta escoge un otro fundacion esencial den comunidad pa yuda. Clientenan por escoge pa haci un donacion na caha y tur esnan cu duna Afl. 1.75 of mas por participa pa gana un di 3 premionan semanal. E prome premio ta un gift card di Afl. 1.000, segundo premio gift card di Afl. 500 y tercer premio gift card di Afl. 250. Tur premio ta donacion di Super Food Plaza mes y tur donacion di cliente ta bai 100% pa e fundacion na turno. Clientenan di Super Food Plaza ta keda invita pa sigui sostene e Super Food Plaza Cares Program pa asina mas fundacion por ricibi un donacion.
