Recientemente e artista local Ty a caba di lansa su prome ritmo combina titula Bela di Amor hunto cu Bulera. E ta conta nos cu di chikito e tabata fanatico di ritmo combina, fiesta di bailabel, Cache Deluxe. Y semper tabata su soño pa tin un ritmo combina di su mes, pasobra e ta algo di nos islanan. Semper p’e e tabata algo hopi zuiver, y awor finalmente biniendo hunto cu Buleria, Rygel y Jeon, a logra pone e cantica aki hunto pa 2023 Ty ranca sali cu su prome ritmo combina.
E cancion a cuminsa den studio na Jeon su cas. E productor Rygel a bini ta trahando riba un proyecto cu e tabata bezig cu ne. Dado momento Jeon tambe tabata bezig cu su ritmo combina, “e ora mi di cu Rygel ban traha un co!” Y nan tabata den studio e dia ey, kiermen a dicidi traha mesora riba dje. A bay over na sigui traha riba e cancion tiki tiki y asina a start e aventura pa cu e proyecto aki.
E cantica yama Bela di Amor, un cancion segun Ty cu ta hopi simpel pero por tin hopi significado. “E ta bay over di e romantismo di baila hunto un rato, e sentimento di ritmo combina.” E ta un tema hopi sensual y intimo. E ta un sentimento unda cu na fin di aña tambe specialmente hopi hende ta den nan ‘feelings’ segun Ty, e tabata e momento perfecto pa lansa e produccion aki.
E tema ta obtenibel riba tur plataforma digital. Ty kier a gradici henter e team di Buleria y tur e guynan cu a bin toca e instrumentonan Live, na Jeon pa haci posibel e grabamento y skirbimento.
