Mientras cu awendia mayoria studiante ta satisfecho cu un solo diploma na nivel di “master degree”, e studiante Rubiano na Hulanda, Karenza Geerman a reta su mes y ta contento di tin su di dos diploma na nivel master den su mannan. Y ainda e ta sigui pa un diploma adicional na nivel bachelor di e mesun universidad, pa e por alcansa su soño, esta di un dia por bira hues.
E studiante a studia ley na Universidad di Aruba pero e sigui na universidad di Utrecht. E ta haci Universidad di Aruba masha orguyoso di mira su ex-alumno sigui desaroya y crece den su estudio di ley, pero no solamente na nivel Hulandes, pero awor tambe na nivel Europeo.
Karenza Geerman tin 23 aña di edad. El a nace na Aruba dia 18 di october 1997. Actualmente e ta biba na Amersfoort, na Hulanda y ta studia na Universiteit van Utrecht. Na aña 2016, despues di a termina Colegio Arubano (VWO), a sigui studia na Universidad di Aruba pa Bachelor of Laws (Arubaans Recht) y a caba na 2019. E ta yiu di Michael Geerman y Raiza Tromp-Geerman.
Despues di a completa su estudio na Universidad di Aruba, el a muda pa Hulanda na juli 2019. Aki el a haci su “Master in Nederlands Recht”, specialisa den “Strafrecht” na Universiteit van Utrecht. A completa e estudio na december 2020 y na maart 2021 el a busca su bul. Na september 2020, a start cu un di dos master, e biaha aki den “European Criminal Justice in a Global Context” tambe na Universiteit van Utrecht y finalis’e awo. Na augustus el a bay busca su bul. Actualmente e ta studiando pa su “Bachelor Rechtsgeleerdheid” na Universiteit van Utrecht.
Motibo cu e ta haciendo un “bacheloropleiding” den “Rechtsgeleerdheid” ta pa asina e por obtene un verklaring van civiel effect. Durante e estudio aki e lo haya materianan di e toga traject pa asina e tin un base pa traha sea como abogado, fiscal of hues na Hulanda. Riba nos pregunta, si e tin dos “master” caba, dicon mester bay un “bachelor”, el a contesta cu un di e rekisitonan pa por traha den e funcion di abogado, fiscal of hues na Hulanda, ta cu mester tin un bachelor y un master di un universidad Hulandes.
Mirando cu e tin dos master caba di un universidad di Hulanda, locual cu el a keda falta pa por traha sea como un abogado, of fiscal of hues, ta un bachelor di un universidad di Hulanda. Y mirando cu toch e lo kier keda Hulanda pa un tempo, a dicidi pa toch haci su bachelor di nobo. Lo no mester studia tur materia, door cu varios di nan el a logra caba na Aruba y a haya “vrijstelling” pa nan.
Na tur Karenza Geerman mes ta pronostica cu e lo studia pa mas of menos dos of tres aña mas pa logra keda cla cu e parti di “bachelor”. Despues ainda lo mester cuminsa e trayecto pa bira hues, cu ta un combinacion parelelo di estudio y practica. Claro cu e ultimo ey no ta cla ainda, pero ta su deseo si, pa por bira un hues den Corte na Hulanda y pa despues di añanan di experiencia, pa e por bin eherce e funcion na cas mes.
