Nomber di tur futuro parlamentario ta conoci. Entrante 9:00 am parlamento tin e reunion publico pa pasa riba e ‘geloofsbrieven’ di e ocho parlamentarionan nobo.
E futuro parlamentarionan a tene un rondleiding na parlamento pa haya sa mas di e trabou y unda tur nan por pasa. Notabel ta cu di MEP por a mira candidato Roderick Hoek, kende tabata pendiente si e lo bira un parlamentario of no ya cu tabata en espera dje contesta di Juan Thijsen. Un otro nomber cu tabata riba lista pa bira parlamentario ta Sueann Ras, pero el a opta pa no bira parlamentario y e siguiente riba lista ta Marco Berlis.
E seis candidatonan di MEP ta Alvin Molina, Setty Christiaans, Shailiny Tromp-Lee, Marco Berlis,Juan ‘Ady’ Thijsen y Darlaine Guedez-Erasmus, kendenan lo uni na dr. Arthur Vallejo, Hendrik Tevreden y mr. Edgard Vrolijk. Lider di fraccion ta bira Shailiny Tromp-Lee.
Mientras pa RAIZ esunnan cu lo tuma over e stoelnan di Ursell Arends y Geoffrey Wever ta Raymicheline ‘Mishe’ Raymond y Raymond Kamperveen. Ken lo bira lider di fraccion pa RAIZ esaki no ta determina ainda.
Despues di e reunion aki di controla e ‘geloofsbrienven’, nan lo por huramenta. Esaki lo tuma luga si tur cos cana segun schedule diabierna mainta na Cas ceremonial di Gobernador, unda e parlamentarionan nobo lo haci esey dilanti Su Excelencia, Gobernador Alfonso Boekhoudt.
