Despues di e accion cu a tuma luga diahuebs ultimo, directiva di Sindicato di Trahador den Telecomunicacion (STT), a manda un carta gradiciendo tur empleado cu a asisti y a yuda cu e walk-out cu a tuma luga riba e dia ey mes, agregando cu nan a laga nan bos zona cual a yega unda cu e mester a yega.
E carta ta sigui bisa cu manera a anuncia durante di e reunion diahuebs, cu lo exigi pa sinta na mesa durante e fin di siman aki caba pa purba yega na un proposicion, pero ya pa diabierna mainta a logra sinta cu gerencia y a yega na un proposicion.
Den e carta cu nan a manda gerencia diabierna ultimo dia 15 di november, ta para cu kier para e entregamento di 12.6% pasobra e otro companianan no ta entregando manera cu mester ta. Loke cu nan ta na altura caba ta cu e minister encarga cu telecomunicacion, den e caso aki minister Geoffrey Wever, a pidi pa un siman di tempo pa por haci un investigacion y si tin discrepancia lo haya esaki bek.
E proposicion cu STT a bay na mesa cu ne diabierna ta cu ta exigi nan 13de maand completo of un compensacion cu ta cubri e 50% di e 13de maand mientras cu ta warda e investigacion keda cla.
Pa otro siman dialuna gerencia lo reuni cu Raad van Bestuur y diamars directiva lo sinta cu gerencia.
“Loke nos por bisa ta cu e pronostico ta mustra hopi positivo,” ta loke cu directiva di STT a laga sa den e carta cu nan a manda pa nan miembronan.
