Ya for di 10:00 am e team dinamico di boluntario di GLW Foundation ta na Centro di Bario Tanki Leendert den e Drive Thru Event yama ‘Feed the Kids Day’, cu ta tumando luga te cu 2:00 pm of te ora cu tur cos caba.
Esaki ta como un muestra di cariño pa nos muchanan cu ta nos futuro generacion. Aki e autonan por pasa den e parkeerplaats di Centro di Bario Tanki Leendert, sin cu mester baha. Aki e muchanan por ricibi nan pakete. Den e pakete cu e muchanan ta haya lo tin un pan cu hotdog, cos di bebe, buscuchi, mangel.
Tio George di GLW Foundation a comenta cu nan t’ey pa reparti mil pakete di ‘goodies’ p’e muchanan riba nan dia special, celebrando Dia di Mucha.
For di mainta trempan caba for di 8:00 am tabatin basta auto. Miss Universe Aruba Thessaly Zimmerman, Miss Teen Aruba Ashantee Martus t’ey presente como tambe tesorero di Aruba Lions Club, Magaly Dijkhoff-Arends t’ey pa duna un man n’e actividad hopi importante y dushi pa nos muchanan.
Asina ta yega Centro di Bario Tanki Leendert cu e yiu, e nieto, e sobrino. Nan t’ey te cu 2:00 pm of te ora cu tin pakete disponibel. Ban celebra Dia di Mucha en grandi cu e muchanan y haci e dia aki uno inolvidabel.