Stichting Musica a tene un reunion extraordinario unda tabata update diferente punto di Stichting Musica riba Aruba Caiso & Soca Monarch. Aki tabata relata n’e banda- y musiconan, manera tambe a trata e carta di SMAC cu a duna nan tres proposicion y fecha pa cumpli pa contesta.
E reunion a tuma luga diaranson nochi y e resultado tabata sumamente positivo, cla y raspa. E gruponan a dicidi di bay p’e proposicion y tuma tur e festivalnan. Riba cierto condicion si, cu Stichting Musica mester tin un tiki mas informacion di e Stichting organisatorio cu ta organisando actualmente algun di e festivalnan aki.
No a bay tras di lomba di ningun hende!
Edwina Werleman, presidente di Stichting Musica a afirma na nos cu na prome luga, nan no a bay tuma decision tras di lomba di ningun hende pa loke ta organisacion di e festivalnan. “Tin biaha tin hopi punto cu ta treci dilanti, y no tin aclaracion riba nan”, segun Werleman. Pa hopi aña, Stichting Musica ta sali y pidi su propio permiso. Esaki no ta sosode un siman adelanta of un luna adelanta, pero mas bien algun luna adelanta. Stichting Musica no a haci nada diferente e aña aki cu no ta mesun proceso di tur aña. “Dus mi kier rectifica, nos no a bay tras di lomba di ningun hende.”
Stichting Musica ta bisa cu nan no ta hibando ningun pleito. “Desde su inicio Stichting Musica a traha na beneficio di su musiconan, esey ta nos trabao, y un festival cu yama Aruba Caiso & Soca Monarch. Nos no ta pleita cu ningun hende, no ta nos style ni custumber. Nos no ta bay den media pa pleita tampoco.”
E musiconan ta di acuerdo
Stichting Musica conoce solamente papia na mesa cu otro manera mester pasobra den ‘pleitamento’, segun Werleman y locual hende ta papia anto specula eyfo, no ta drecha e situacion. “Ora bo sinta na mesa y por enfrenta otro, por yega na cierto acuerdo cu otro y compronde otro. Mi ta haya fastioso pa bisa esaki, pero nos no ta pleitando cu niun hende.”
Pa mas lesa TREMPAN.COM.
