Tabata na december 2018 cu e Presidente di Stichting Educacion Profesional Basico, SEPB, esta Robert Nieuw a hay’e ta tuma su retiro debi cu el a yega e edad maximo pa por ta den directiva di e fundacion, esta 70 aña. A pidi Minister Rudy Lampe pa haci’e 75 aña pero a nenga. Consecuentemente a nombra e conocido abogado mr. Fred Gibbs den e funcion di Presidente, debi cu e tabata den e fundacion caba, den representacion di Stichting Katholiek Onderwijs Aruba (SKOA).
SEPB ta consisti di un directiva di 5 miembro. Nan ta dos di Gobierno, nombra dor di Minister Rudy Lampe, dos di SKOA y nan cuater hunto ta nombra e di 5 cu ta bira e Presidente di e directiva. Na momento cu Robert Nieuw a sali, a nombra abogado Gibbs den funcion di Presidente y Gobierno a probecha cambia e dos miembronan anterior nombra pa Minister Michelle Hooyboer pa e pone dos di “su” hendenan.
E miembronan di directiva ta Giovanni Kock, Darrelyn Maduro, Ana Clara Anthony, Frederick Gibbs y Francisco “Pancho” Geerman. E maneho diario ta den man di e Director, Johanna Bosma desde aña 2018 caba.
Locual a sosode ta cu momento cu Gibbs a tuma e directiva over, e relacion interno cu e 4 otro miembronan a bira malo. A bira un reto pa e 5 miembronan comunica cu otro, cu e respet necesario. E situacion a empeora te cu na november ultimo, tur 4 miembro, pues esunnan apunta pa SKOA y esunnan apunta dor di Minister Lampe a dicidi di tuma nan retiro hunto. Algo similar manera a sosode na Universidad di Aruba algun luna pasa y manera a sosode algun aña pasa tambe den directiva di Hospital.
A informa Minister dr. Rudy Lampe di e situacion pa e intermedia pero te ainda esaki no a conduci na un final “feliz”, consecuentemente ta dos luna caba cu e fundacion ta sin directiva. Hopi decision ta keda tranca pa e mesun motibo caba, aunke cu den urgencia e Presidente mes lo tin cu tuma decisionnan su so. E forma di traha aki sin duda no ta cumpli cu reglanan di “bon gobernacion” den cual un directiva ta draai riba un “one man show”.
Stichting EPB ta maneha dos scol, EPB Hato y EPB San Nicolas. Hunto nan tin mas o menos 2000 alumno y ta maneha mas o menos 160 docente entre e dos scolnan aki. E fundacion ta existi desde aña 1992.
