Awe nochi ta tuma luga e di dos anochi di pre final di Caiso y Soca. ‘NFuzion ta participa cu cinco cantante y cinco cantica. Stellaris Casino semper ta cla pa yuda e musiconan y e biaha aki nan ta sostene ‘NFuzion. Pa Stellaris Casino tabata un honor di por tabata presente den e celebracion di dies aña di ‘NFuzion.
Yazira Feliciana, director di mercadeo di Stellaris Casino, a indica cu nan a cuminsa traha cu ‘NFuzion y aki a bin ripara cu den e banda aki tin talento pa admira. Y esey ta e motibo cu nan tin e sosten di e casino. Stellaris Casino kier sigui stimula e musiconan pa sigui produci pa entretene e pueblo di Aruba.
E casino no por aporta cu tur banda, pero nan ta sigui aporta n’e banda pa asina nan por sigui entretene hende.
E team di High Performance, Stellaris Casino y Bingo Aruba a sinta hunto pa bin cu e regalo perfecto pa keda como un recuerdo pa semper p’e dies aña di existencia. Y asina aki nan por bay mas cu esey. E team aki a yega na un armband cu ‘NFuzion y nan nomber graba den dje. Esey a haci e parti emocional, ya cu nan no a spera esaki. Tambe a duna e pechinan y serbete, caminda awe nochi tur fanatico di ‘NFuzion por apoya e canticanan di e pre finals.
Pa e detaye aki no por a keda sin menciona y gradici Oduber Golden Palace, no solamente pa e excelente trabou haci pero tambe pa nan servicio excepcional. Un miyon di danki pa e esfuerso maximo, pa haci esaki posibel y mira e sonrisa riba cada integrante cu a ricibi un bunita recuerdo den forma di un armband.
Diamars anochi tabatin celebracion di dies aniversario di ‘NFuzion, pero tambe e oportunidad pa e hendenan cera conoci cu e canticanan. Tur hende sa cu ‘NFuzion ta toca duro, pero e biaha aki ta bin mas duro. Esey ta pone cu Stellaris Casino ta orguyoso di sostene e banda.
Ofo Escudero, musico, a expresa cu e tabata un sorpresa total y ‘NFuzion ta traha hopi di cerca cu Stellaris Casino. Nan ta un famia, un team, y semper nan ta traha hunto. Tur aña, semper nan ta purba di bin cu cos diferente. E aña aki nan a sorprende esunnan cu tin dies aña cu e banda, e tabata pone bo bay den pasado pa mira den kico tur a pasa. Pa Escudero e tabata hopi emocional, pasobra e tabata dies aña cu tabata pasa den un lapso di par di seconde.
