Aña pasa Aruba Tourism Authority (ATA) a acerca Fundacion Go Cultura pa traha hunto riba e proyecto di steelpan den carnaval. Tambe The Invaders ta forma parti di e proyecto aki, di cual lo habri parada principal cu steelpan. E musica di carnaval a cuminsa cu e zonido di steelpan.
Edjean Semeleer, co-fundado Go Cultura Foundation, a splica cu ATA a acerca nan den luna di augustus-september pa asina forma parti di e proyecto. A pidi e fundacion pa yuda cu e proceso door di planea, ehecuta, produci y presenta un homenahe na e historia di carnaval. Pero tambe un homenahe na e musica cu a cuminsa cu e carnaval desde un inicio.
Derchlien Dijkhoff, Senior product specialist, a splica como tributo na 70 aña di carnaval, ATA a tuma contacto aña pasa cu Go Cultura Foundation pa bin c’un proyecto unico pa habri e paradanan di carnaval. Asina ey ta duna bek na comunidad y ta mustra kico ta e esfuersonan cu ATA ta haci p’e cultura di Aruba p’asina persever’e y hacie mas grandi.
Lee Connor, presidente di Aruba PanMan Foundation, a splica cu e ta forma parti di The Invaders, di ta musico, tambe ta haci diferente proyecto pa Aruba y e muchanan. Nan tene diferente tayer unda nan ta trata solamente e steelpan y su musica. Pa Carnaval 70 The Invaders ta den parada y p’esaki e ta contento cu nan ta forma parti di dje.
No ta solamente ta celebra 70 aña di existencia di Carnaval, pero tambe tin cu celebra The Invaders. Su tata Edgard hunto cu The Invaders ta un di e pioneronan di steelband na Aruba. P’esey su persona hunto cu Nico y Eugene ta purba di mantene esaki.
Pa loke ta trata nan presencia den parada, aparte di duna e nostalgia regreso di e musica di steelpan, nan ta purba duna e historia di e musica. Tabatin hopi cantica cu hende ta recorda aunke a lubida algun di nan. Pero ta nan deber di trece esaki bek den un forma pa recorda nan riba un manera sweet di e canticanan bunita cu ta di Aruba.
Pa mas lesa TREMPAN.COM.
