Den un entrevista cu Geraldine Kock, vice-presidente di Nine Lives Aruba Foundation, el a conta nos di un evento special cu e fundacion aki ta bay tin dia 29 di januari binidero. Esaki ta bay ta den forma di un bingovirtual. Asina Kock kier a invita un y tur pa cumpra carchi pa esaki pa asina yuda e fundacion sigui provee e servicionan necesario pa tur nos pushinan como tambe nos cachonan stima. Por cumpra carchi pa e bingo aki na localidad di e fundacion mes, cu ta ubica na Jaburibari 8B. Dia 23 di januari di 10:00 am pa 4:00 pm Nine Lives Aruba Foundation ta bay tene un drive-thru tambe den cual por pasa dilanti e fundacion pa asina cumpra nan carchi di bingo.
Por medio di e bingo aki e fundacion ta buscando pa recauda fondo pa asina cubri e gastonan di veterinario encera cu nan proyecto di “spay and neuter” di e cachonan cu tin riba caya como tambe pa yuda e personanan cu tin demasiado mascota na cas y ta pidi ayudo cu esaki. Asina Kock a probecha pa menciona tambe cu na Aruba nos mester cuminsa cambia nos mentalidad pa loke ta mascota.
Pues ta asina cu manera cu nos bira doño di un mascota, e prome cos cu nos mester haci ta ‘spay and neuter’ pa asina evita e gran cantidad di bestia cu nos tin actualmente riba caya. Na Aruba tin un cantidad grandi di tanto pushi como cacho riba caya hunto cu nan yiunan y esaki ta algo inhusto pa e animalnan aki. Consecuentemente ta e fundacion aki mes mester tuma nan over y capacidad no ta mucho amplio mas pa haci esaki. Segun Kock, si ‘spay and neuter’ esaki no ta pasa.
