SPA tabata tin varios reunion ultimamente, refiriendo na un desaroyo cu a tuma luga, cu no tabata mucho na agrado di e miembronan di SPA. Naomar Hijmering, kende ta brigadier 1ste klas y comisario di sindicato SPA, ta duna un aclareacion riba un articulo cu a sali den Awe Mainta, unda cu cierto puntonan a wordo publica, cu como si fuera cu SPA a discuti cu su miembronan den un reunion ultimo cu tabata tin. Esey no ta al caso. Despues di un reunion cu comisario di polis, cu nan tampoco no tin nada di haber cu e articulo eynan.
Di unda Toko Winklaar ta saca e informacionnan ey, SPA no sa. SPA no tin nada di haber cu e articulo loke a sali y e ta un poco falta di respet y lamentabel cu un medio di comunicacion, mirando caba cu tabata tin un poco discordia entre leiding y e bestuur, cu awor aki cu cosnan ta canando na un nivel profesional y riba bon caminda, ta trece cierto puntonan cu no a wordo ni discuti den e reunion.
A base di tur esaki sindicato SPA ta distancia su mes di e articulo cu a wordo publica den e corant Awe Mainta.
E puntonan
E puntonan ta puntonan di principio cu a wordo treci p’adilanti. E falta di curso, etc. SPA a haya oido di leiding. Nan ta bezig cu negociacionnan. Nan ta bayendo riba e bon caminda. E comunicacion entre SPA y korpsleiding a mehora hopi. Por bisa cu pa e miembronan por ta trankilo. Cos ta canando bon.
Proceso
E puntonan aki ta canando caba. Hopi a cuminsa cana. Tin puntonan cu a yega caba na solucion y e otronan ta den proceso. Ta premira cu cosnan lo sali bon, segun Hijmering.
Polisnan ta contribui
E miembronan mes ta trece nan preocupacionnan cerca e directiva di SPA. Nan ta trece nan ideanan y esey e sindicato ta trece dilanti na leiding den reunion. Asina ta delibera hunto cu nan y nan ta bin cu e solucionnan.
Cosnan ta canando bon pa Cuerpo Policial na e momentonan aki.
Ayudo
E departamentonan cu ta uniforma di Cuerpo Policial, ta duna un man. Manera den e caso di eleccion, tur polis lo ta riba caya. All hands on deck. Ta bay tin tur tur polis uniforma y no uniforma. Departamentonan di Recherche tur lo duna un man pa garantisa e siguridad di pueblo.
No a papia ainda specificamente riba eleccion, pero si e punto a bin dilanti y comisario di polis a menciona cu e lo tene esey na consideracion y cu tur hende lo tin cu duna un man.
Trahando trankil
Ainda e siman cu a pasa, tabata tin poco preocupacion y duda. Ora cu a papia cu comisario di polis, cosnan a wordo aclarea y a trece over pa e miembronan. Nan por ta trankil, segun Hijmering.
Reaccion den comunidad
E reaccion den comunidad ta mustra bon y ta spera cu por conta cu e pueblo ora cu algo pasa, por haya nan sosten, nan yudansa, sea den informacion of cosnan asina. Esey ta hopi importante. Den casonan di crimen grandi, unda por resolve e casonan y asina brinda e pueblo e siguridad cu nan tin mester.
