Un reto cu Algemene Ziektekosten Verzekering (AZV) ta keda cu ne ta e scarsedad di dokter di cas. Nan no ta hayando hopi peticion di dokter di cas, pero mundialmente esaki ta un reto den sector medico unda cu falta incluso specialista como nurse.
Cu si AZV ta hayando solicitud di dokter di cas, Solange Tchong, relacionista publico di Organo Ehecutivo AZV, a splica cu esey ta keda como un reto. Esaki ta bin pa motibo c’un parti nan kier mas dokter di cas, pero di otro banda Aruba ta competi hopi cu e paisnan rond di nos. Loke AZV a haci den transcurso di tempo, nan a percura algun aña pasa pa bin cu e huisartsen opleiding na Aruba mes. E personanan cu a haci e algemene geneeskundige opleiding, cu ta basis arts, por bira dokter di cas. Esaki ta un specialisacion riba su mes.
Esey nan a amplia e cantidad di cupo, unda cu antes tabata cuater pero awo a bin tres mas. Tin mas luga y mas persona por haci e opleiding. Esaki ta un inversion hopi bon cu AZV a haci, pa motibo ey di e trayecto aki nan por yega na dokter di cas cu ta entrena, opgeleid aki na Aruba mes. Esey ta bay yuda.
No ta haya suficiente solicitud
Tchong a sigui indica pa loke ta solicitud mes, nan no ta haya suficiente. Nan a haya algun interesado cu ta acerca AZV. Aki ta bin e reto di kico por ofrece, e condicion di trabou, etc. Loke AZV a ripara ta cu den e ultimo añanan, ta cu mester bay busca otro solucion. P’esey a bin cu Cas di Dokter, cual tin diferente dokter di cas bou un solo dak cu por percura p’e continuidad di servicio medico sigui.
Den ultimo tempo, nan a ripara cu dokter di cas, specialmente esunnan femenino, tin deseo di traha part-time. No tin deseo di traha tempo completo. P’esey nan a pensa riba e estilo di traha como team bou un dak, ta duna e flexibilidad ey. Esunnan cu ta desea di traha part-time, por haci esey. Di otro banda mester mira cu e tin di haber cu orario, planificacion y hopi mas.
AZV a inicia y sostene e idea aki semper. Tin un Cas di Dokter caba, pero e idea ta pa sigui amplia esey, pa bin cu mas estilo asina. Di un banda pa tin suficiente dokter di cas pa atende e aseguradonan, di otro banda pa bay den kico ta e deseonan di loke awendia ta e dokternan di cas.
