Un di e instancianan cu tambe mester a adapta su sistema di traha den 2020, e aña di COVID, tabata AZV. Den un conferencia di prensa awe nan a splica nan desaroyo den 2020 y a splica cu nan a cambia di un servicio personal pa un sistema mas digital den 2020.
Dia 12 di december, 2019 AZV a lansa su app nobo na unda cu a invita e aseguradonan pa haci uzo di e servicio di app, cual ta un medio na unda cu cada persona por identifica nan mes como un cliente di AZV.
Vocero di AZV, Solange Tchong, a splica den un rueda di prensa cu esaki por a sigui rapidamente den januari 2020, unda cu a start un campaña riba Facebook, pa informa clientenan pa haci uzo di e AVZ app.
Sinembargo cu e Shelter in Place (SiP) a pone AZV acelera su trabaonan y door di e SiP y COVID a haci cu AZV rapidamente mester a bay over na traha den un otro forma y esaki a haci cu mester a cambia tur servicio unda cu ta atende cliente personal na nan oficina den Rumbastraat 21, pa bay over na servicionan digital.
Esaki a haci cu a cambia full y bay over via di diferente email pa cliente, duna e servicio cu AZV ta custuma caba cu ne, pero awo digital.
Un di e cosnan interesante ta cu a percura e ora pa riba nan website, cu tambe a introduci den 2020, facilita e clientenan cu un loket digital, unda cu e cliente por subi riba e website y yena diferente formulario di inscripcion, informacion pa cambio. Pero tambe por haci pregunta pa motibo cu a introduci e chat live, banda di e acostumbrado number telefonico 5279900, unda cu e cliente por haci pregunta.
E reaccion pa e app ta hopi positivo y tin casi 39 mil cliente caba haciendo uzo di esaki. AZV ta hopi satisfecho pa e reaccion y ta spera cu aña cera cu mas cliente cu lo haci uzo y registra nan mes of download e AZV app pa asina nan por sigui haci uzo di esaki.
A amplia e funcionalidadnan riba esaki tambe. Awo por cambia di dentista of botica directamente via e app. Por haya notificacion di AZV via e app tambe, etc.
Un otro trayecto cu a encamina di cual e publico no por a ripara pero AZV si, tabata naturalmente e cambionan riba e area di informacion, comunicacion y technologia, unda cu e departamento aki por a percura pa full un trayecto nobo unda cu a cambia sistemanan y a actualisa tambe e webpage di AZV, cu ta instrumental pa e dunadonan di cuido, esta e dokternan, e asistentenan di dokter, etc. por wak data of informacion di e asegurado di AZV.
Via di e webpage nan por mira si e cliente nan dilanti ta registra legitimamente na AZV. E pagina aki di dokternan a ampli’e, a actualis’e y a percura cu tur servicio por bay via e webpage aki.
Mester imagina cu AZV a bay eigenlijk for di e sistema di antes unda tabatin hopi entregamento di facturanan via papel, awo esaki ta pa pasado. Ta trahando caminda cu tur dunado di cuido ta haci uzo di e webpage y ta entrega nan facturanan via e pagina aki, cu ta specialmente pa nan y tambe tin por ehempel e parti cu nan por haci peticion di autorisacion di AZV.
Tur cos a bira awor aki digital pa e dunadonan di cuido tambe.
