Awe algo despues di 11:00 am a surgi un problema den e planta di WEB N.V. na Balashi. Consecuentemente, coriente a bay tur rond di Aruba, paralisando e bida normal y afectando nos economia. WEB a anuncia cu lo dura cuater pa cinco ora prome cu coriente lo ta stabiel atrobe.
Pero asina mes, den ora di merdia caba a cuminsa haya coriente bek. Pero cada biaha atrobe coriente ta bay bek den barionan, debi na e instabilidad.
Elmar y WEB a pidi clientenan comprension pa e situacion, cu ta for di nan alcance. Riba red social a cuminsa mira kehonan caba cu aparatonan ta kimando, precisamente pa e forma di coriente keda bay bin asina.
E ultimo biaha cu Aruba a conoce un black out tabata dia 4 di juli 2021. Esey tabata e di cuater black out bou mando di director Luis Oduber. Awo e director interino, Laty Wever ta confronta su prome black out, algun luna despues di e ultimo, cu consecuencia cu a paralisa economia di nos pais pa algun ora caba.
Ta pidi pueblo compresion, pasobra tanten cu coriente ta instabiel, por spera mas di e situacionnan asina, den cual coriente ta keda bay bin.
