Miembronan di sindicatonan SADA, SPA y SIMAR a reuni patras di Marketplace cu e meta pa cana bay Bestuurskantoor pa entrega un carta na prome minister. Nan ta urgi gobierno pa sinta mas pronto cu ta posibel pa trata diferente punto.
Un di e preocupacionnan cu nan a entrega tanto porcentahe di salario, y awo nan kier sa si nan ta haya recompensa p’esaki na momento cu e crisis pasa. Desde luna di mei e empleadonan di sector publico a entrega tanto porcentahe di salario. Segun presidente di SPA, ultimo biaha cu nan a tende di Minister di Husticia ta cu e toelage di frontliners ta na Directie Financiën y no a tende nada mas. Na Hulanda polisnan ta haya un bonus di 300 euro ariba nan frontliner toelage, pero aki na Aruba ta keda corta so for di nan.
Presidente di sindicato SADA a expresa cu nan a yega Bestuurskantoor cu e miembronan pa mira ki ta nan deseo. Na luga di manda carta via email, e miembronan tabata kier pa yega Bestuurskantoor y entrega carta na prome minister. Dia 23 di october a manda prome carta, pero despues a manda dos carta mas dia 29 y 30 di october pero no a ricibi reaccion positivo for di gobierno.
Despues di a warda basta minuut, e sindicatonan a bati na porta pa mira si Prome Minister ta baha pa atende nan. Pero nan a mira via e bentana di porta cu esnan sinta paden no ta haciendo nada y esey a pone cu e miembronan di sindicato a cuminsa aplaudi y pidi pa Minister sali. Despues di un rato hefe di siguridad di Bestuurskantoor a sali y splica cu e mandatario ta den reunion y no sali, pero cu lo hiba nan mensahe p’e. El a regresa cerca nan cu e mensahe cu tres so por subi y lo atende cu nan. Despues di a puntra nan miembro, e tres lidernan di Sindicatonan SADA, SPA y SIMAR a bay cerca Prome Minister pa papia y entrega nan carta.
