Despues di basta luna di paz entre e sindicatonan, awo un biaha mas, ta reina incertidumbre bou di e mundo sindical, relaciona cu e introduccion di un Prestatie Management, entrante prome di januari 2023.
Diabierna atardi, e sindicatonan SADA, SEPPA, TOPA, SPA, SIMAR tabata presente pa un reunion cu DRH, pa un preocupacion cu nan tin relaciona cu e asina yama Prestatie Management, cu ta un sistema di evaluacion di trahado cu Gobierno kier introduci entrante prome di januari 2023.
Edward Maduro, lider di Sindicato SADA, a cuminsa na bisa cu ta trata di un situacion cu ta reina caba for di algun tempo, mirando cu e parti di Landspakket cu Minister Presidente a negocia cu Hulanda, lo tabata e introduccion di e Prestatie Management, lo ta e maneho nobo pa 2023. E sindicatonan ta di acuerdo cu lo mester introduci un sorto di sistema asina, pero tin algun punto di diferencia, cu no ta mucho cla pa e sindicatonan. Pero januari ta ey mes, nan ta haya cu ta un poco prematuro pa introduci esaki.
E sindicatonan a manda un carta tanto pa S.E. Gobernador Alfonso Boekhoudt como pa Minister President, mr. Evelyne Wever-Croes, unda nan ta señala nan preocupacionnan. Durante tur e tempo aki, desde cu a cuminsa cu e dialogo riba e tema aki, a señala cu tin hopi punto cardinal, cu tin di haber cu e parti di evaluacion. Manera cu e ta awo, ta mustra cu e evaluacion ta conta solamente pa e homber chikito, pero no pa esunnan den e puestonan di liderazgo. Tin hopi cos cu lo introduci, pa loke ta e ambtenaarnan, pero pa e hefenan di departamento y directornan, no tin nada.
Maduro a sigui bisa cu e fecha di prome di januari 2023, no ta factibel. Tin hopi punto cu lo mester discuti riba dje na mesa. P’esey nan ta bisa cu nan ta kere cu e fecha prome di januari no ta factibel. Un punto cardinal ta e parti di evaluacion. Ora cu e evaluacion di un ambtenaar sali malo, kico lo pasa cu nan. Pero no tin claridad riba kico lo sosode cu esunnan cu puesto di liderazgo. Sindicato ta di opinion cu mester bin mas discusion riba esaki. Tin hopi punto cu mester discuti na mesa ainda, sea cu Gobierno of e representantenan di Gobierno.
Pa un relato mas amplio, lesa TREMPAN.
