E ultimo dia di audiencianan den corte relaciona cu tratamento di caso Avestruz a tuma luga diabierna mainta caminda tabata oportunidad pa ministerio publico reacciona riba e dupliek cu defensa a trece dilanti ya caba na comienzo di siman; pa specificamente e sospechosonan Oslin ‘Benny’ Sevinger y Pieter Susebeek.
Door di e poco comentario cu tabatin di fiscalnan, e sesion a bay den practicamente un tempo record. E parti mas largo di e mainta tabata e ultimo palabra di Sevinger. Posteriormente hues mr. de Doelder a indica cu e no ta bay determina di awo caba un fecha pa su decision pasobra ta hopi material e tin di pasa door di dje. Sinembargo, riba peticion di abogado defensor, a indica cu e ta calcula cu lo ta durante prome trimester di 2023.
E audiencia atendi pa prensa, famia di e acusadonan Sevinger y Susebeek, como tambe door di algun di e abogado defensor di otro acusado a transcuri mas lihe di loke tabata spera, principalmente, paso ministerio publico, kende tabata e prome cu oportunidad pa papia den e asina yama repliek, no tabatin mucho di bisa. E ora ey e turno a bin bek na e abogado defensor, mr. David Kock pa reacciona riba nan y na e acusadonan mes pa duna nan ultimo palabra.
Pa e relato completo, lesa edicion di TREMPAN
