Diaranson, 15 di december, Prome Minister mr. Evelyn Wever-Croes a manda un carta n’e sindicatonan SADA, SIWA, UEA, OPPA, SPA, VWI, ALVAST, STT, FTA, SIMAR, SEPPA, unda cu el a indica cu a tuma luga un combersacion dialuna ultimo, dia 13 di december, entre nan y gobierno di Aruba.
E sindicatonan a pidi gobierno pa hala e ‘inkorting’ di salario di e empleadonan di sector publico y semipublico y e recorte di pensioen p’e luna di december 2020. Ademas no permiti e deduccion di e oranan no traha p’e empleadonan debi n’e welga.
Gobierno a indica cu e mester di mas tempo pa contesta e peticion aki, ya cu e recorte ta un condicion estableci pa Conseho di Minister di Reino (RMR) pa e sosten di likides. Gobierno tambe a indica cu e contesta riba e peticion lo tuma luga dentro di dos biaha 24 ora.
Despues di un consulta amplio, prome minister a indica cu e secretario di estado Knops a informa cu diabierna, dia 17 di december 2021, lo tuma un decision riba e peticion di Aruba pa por permiti elimina e medidanan di austeridad. P’e rason aki, gobierno di Aruba solamente por responde na nan peticion despues di e fecha menciona.
Pa loke ta e peticion pa no kita e oranan no traha di e empleadonan publico debi n’e welga, gobierno lo tene un consulta riba esaki.
P’e bienestar di ordo, gobierno ta bolbe invita e sindicatonan pa dialoga, pa yega na un posicion comun y pa negosha asina conhuntamente cu gobierno di Reino, e reduccion di e medidanan di austeridad.
Di su banda diaranson, dia 8 di december, secretario di estado Knops a contesta prome minister riba e grado di recuperacion economico y e necesidadnan di likides di Aruba, den e prome trimester 2022. Den e carta aki ta haci referencia na e conseho di Colegio di Supervision Financiero di Aruba (CAft) relaciona cu e sosten di likides di Aruba pa e prome trimester di 2022.
Manera cu Landendirecteur a indica den nomber di Knops, den e carta di dia 11 di october, por a dirigi e preguntanan riba e calculacion di e sosten di likides y conseho na RMR riba e desviacion permiti di e normanan presupuestario na CAft. Por lo tanto Knops a referi prome minister p’e comparti e informacion n’e conseho di CAft prome, pa asina discuti esaki cu CAft.
Den e carta aki tambe a reitera e peticion di Aruba na RMR (cu fecha dia 22 di october) di acepta e eliminacion parcial di e reduccion di 12.6% den condicion di trabao, principalmente p’e empleadonan di sector publico y semipublico y 25% p’e parlamentario y ministernan. E peticion aki lo tuma un decision dia 17 di december proximo den RMR.
A pesar di e contesta di prome minister, a drenta na ultimo ora cu e sindicatonan no kier tende mas y ta planeando un accion cu lo tuma luga diahuebs, dia 16 di december, cuminsando pa 7:30 am saliendo di Julianaplein pa asina pone presion pa elimina e 12.6%.
