Ta parce cu e ultimo declaracion haci door di ex-altoinspector Alvin Molina, awendia miembro di fraccion di MEP den Parlamento di Aruba, no a cay den bon tera cerca e polisnan. Un rato pasa e sindicato cu ta defende interes di polis a publica riba nan pagina di Facebook cu ta desaproba e declaracion haci pa nan ex-colega cu awendia ta politico. Ta nota cu, mescos cu ayera, cu polisnan ta insisti cu trabou di polis y politica no ta mescla cu otro!
Parce cu den un conferencia di prensa emiti door di e parlamentario na warda di Balashi, a critica e hecho cu ta hiba autonan eynan cu de facto no mester a bay eynan, strobando pa polisnan di por kita autonan cu si mester tuma den beslag, pa falta di espacio. E parlamentario a critica e maneho actual di mando di polis pa cu wardamento di autonan na Balashi y e hecho cu no tin siguridad cu ta haci e situacion ainda pio. Siendo presidente di e Comision Fiho di Husticia den Parlamento, e lo manda yama e minister aden pa duna cuenta di con lo cambia e maneho pa atende cu e retonan aki den forma urgente.
Pero, e declaracionnan haci parce a cay den mal tera na adres di e defensornan di ley. Den un reaccion awe e sindicato a skirbi lo siguiente: “Nos di SPA kier a aclaria riba e entrevista cu Sr. Molina a duna na prensa dia 9 november 2021 tocante e situacion na Balashi/garage di polis. Miembronan a acerca nos directiva pa expresa nan malcontento tocante e expresionnan haci di parti di Sr. Molina pa loke ta trata e situacion na Balashi/garage di polis. Mester remarca cu no ta na su luga pa divulga proceduranan interno di KPA na publico. SPA ta lamenta y no ta compronde kico e meta di e expresionnan haci di parti di Sr. Molina ta, mirando e hecho cu e mes tabata hefe di Polis y awo ta trece esaki dilanti na e forma aki. Tambe mester subraya cu tur maneho den KPA tin su proceso y no ta asina cu un vehiculo ta wordo tuma den bewaring/beslag zomaar. Esaki ta sosode den cuadro di un investigacion pendiente of pa motibo cu no a cumpli cu leynan di trafico stipula.”
