Recientemente e presidente di Sindicato di Polis di Aruba (SPA), Rodney Solognier a duna un entrevista den cual a confirma cu miembronan ta sigui den un lucha cu Departamento di Recurso Humano (DRH) pa otorgamento di promocionnan cu mester a sosode caba. E departamento a caba di informa e sindicato di un maneho nobo den cual ta evalua cada decreto ministerial (landsbesluit) di promocion a base di e maneho di malesa, esta cuanto dia/tempo e agente tabata AO. Sinembargo, tin hopi caso caminda e agente policial a bira malo y casi muri, a consecuencia di e condicionnan den cual e tin cu eherce su funcion. DRH no ta mira esey.
Adicional na e lucha pa e decretonan ministerial di promocion, varios agente tambe a demanda gobierno riba e reduccion di 5% den nan salario. E sindicato ta den un lucha pa yuda su miembronan defende nan mes den corte, un gasto innecesario na nan opinion.
Solognier a indica cu el a yega di trece dilanti den un encuentro cu Conseho di Minister caminda a propone pa trece un solucion pa tur e decretonan cu tin pendiente. Sinembargo, a bis’e cu esey ta imposibel ya cu cada decreto ta diferente y mester atende cu cada un separa.
Pa e relato completo, lesa e proximo edicion di TREMPAN.