Diahuebs merdia a tuma luga un otro accidente na Ponton, e biaha aki den cercania di Harmony Supermarket, n’e T-splitsing di Sta. Helenastraat/Pitastraat.
Polis, pa precaucion y pa haci nan investigacion, polis a cera e caminda. Tin di remarca cu e trafico cu ta bin for di den Pitastraat ya caba mester a desvia nan, debi na un otro accidente, cu resultado fatal riba Watty Vos Boulevard y pa nan mala suerte a bin topa cu un otro accidente na Ponton, trancando trafico cu tabata circula den e vecindario.
Ta un accidente cu basta daño material, caminda cu un Honda Pilot y un pickup marca Nissan a dal den otro.
Pa loke t’e Honda Pilot, e impacto a haci cu e airbagnan a sali debi n’e accidente. Parti dilanti di e auto n’e wardalodo y tire banda di chauffeur dilanti, a keda basta kibra.
Pa loke t’e pickup, algun di e ocupantenan mester a haya asistencia medico y e paramediconan presente a sa di duna esaki.
E accidente aki a tuma luga pa motibo di preferencia, cu e consecuencianan ya conoci. Daño material, manera ya indica, ta considerabel.
