Directiva di SIMAR a tuma nota cu tin hopi remarke riba tanto Parlamento, como riba
SIMAR pa cu tratamento di e ley di Restructuracion Salarial di maestronan. Ta asina cu SIMAR a forma parti di e “stuurgroep” cu a traha pa basta aña na un structura nobo di salario di maestronan y otro actornan importante den enseñansa.
E structura ta inclui discribcion di e diferente funcionnan y e forma con e empleado lo por crece den entrada durante su trayectoria profecional. Na luna di mei e “stuurgroep” a culmina cu su trabou y a entrega e documento en cuestion na minister di enseñansa, Sra. Michelle Hooyboer-Winklaar. Parlamento na su turno a trata e ley y a lansa su preguntanan pa cu esaki. E preguntanan aki, cu tabata encera algun investigacion, a ser contesta. Pues e unico paso cu tabata falta ta pa pasa e ley. No ta den man di sindicato pa yama of exigi reunion di Parlamento y sindicato no tin control riba su funcionamento. Nos por a tuma nota cu desde eleccion Parlamento di Aruba no ta funciona optimal mas. Basa riba e echo aki, SIMAR ta di opinion cu no ta responsabel pa trata e ley ya cu ta trata di un ley cu tin peso financiero y ta di suma importancia pa e posicion huridico di e empleadonan en cuestion. SIMAR a haci tur intento posibel pa e ley por a ser trata mas pronto cu ta posibel. A busca contacto cu presidente di e “stuurgroep” na diferente ocacion pa informacion di e desaroyonan. Esaki sin exito. Tambe directiva a pidi reunion cu presidente di Parlamento, Sra. Mervin Whyat-Ras pa haya informacion di e motibo pa no trata e ley y pa mustr’e e importancia pa haci esaki mas pronto cu ta posibel.
Esaki sin a ricibi ningun reaccion. Directiva a tuma nota riba medionan social cu ainda tin hopi maestro cu no ta na haltura di e desaroyonan pa cu e ley y ta tribi di acusa SIMAR di no a percura pa informa nan. Esnan prome yama pa duna informacion ta e dunador di trabou. SIMAR ta sirbi su miembronan cu ta aporta na e sindicato y a tene varios reunion informativo desde inicio di e trayectoria pa tene nan debidamente informa. Asta a yega di invita no miembro pa sierto encuentronan, maske no ta SIMAR su deber. Ta urgi tur esnan concerni pa pone nan mes na haltura di e desaroyonan aki. Tene bo mes informa ta bo responsabilidad. SIMAR ta en espera di e formacion di e Parlamento nobo y lo urgi esaki pa trata e ley mas pronto cu ta posibel.
