Parlamentario y candidato number 29 di AVP Benny Sevinger ta deteni na Centro di Husticia na Santa Cruz. Pero den oranan laat di atardi tanto famia como e amigonan di Sevinger a presenta na Centro di Husticia den un caravana.
Nan a haci esey como meta pa mustra nan sosten na Benny Sevinger, kende ta deteni p’e caso di Avestruz. Tabatin speculacion riba e detencion di Sevinger, pero ayera Ministerio Publico a haci esey. Despues di a presenta na warda di Santa Cruz, famia y amistad a bay warda di Shaba pa entrega e articulonan personal di Claudia Sevinger, casa di Benny.
Na momento cu e caravana a yega Centro di Husticia, nan a purba blokia entrada. Consecuentemente a pidi pa mas polis presenta na e sitio. Na un manera inespera simpatisantenan a yega na Centro di Husticia, unda Sevinger ta deteni. E agentenan a saca un auto pa blokia e entrada y pa evita cu mas auto subi tereno y blokia nan entrada.
Sostenedo Flanders a indica cu e mester a bay haci algo na Playa, pero di biaha el a keda pa duna su sosten na famia di Sevinger. E ta di pensamento cu loke a pasa cu e parlamentario ta algo inhusto, pasobra loke ta haci cu Benny Sevinger ta persecucion politico. E wacht commandant tambe a presenta na ward’i polis di Santa Cruz y a pidi pa tur hende bandona e sitio.
