Aña 2020 ta cabando y sector di enseñansa a pasa den retonan hopi grandi, unda cu mester a adapta nan sistema di duna les. Tur esaki ta trece cu ne cu nan mester sigui desaroya nan mes y pa esaki mester di tempo. E sindicato ta boga pa baha e cantidad di oranan cu e docentenan ta para dilanti klas.
Josephine Albertus, como presidente di sindicato SIMAR tabatin un aña yen di reto pa guia e sindicato den diferente turbulencia, cuminsando cu cambionan unilateral cu kier a trece den e sector aki y tambe cambionan den forma di duna les debi na e pandemia di COVID1-9.
E tabata un aña cu hopi reto, el a bisa. A cera 2019 cu indexering y e tema aki a sigui cu ne den 2020 y te ainda e no ta soluciona. COVID a trece un reto grandi, cu scolnan mester a cera nan porta pa varios siman. Pero tambe e docentenan mester a cambia nan forma tradicional di duna les pa un sistema digital di forma abrupto y sin cu tabatin e preparacionnan necesario pa esaki. Hopi scol ainda ta traha cu e sistema di borchi y krijt y buki. “E no tabata facil, y SIMAR ta hopi orguyoso di e maestronan. For di momento cu COVID a drenta, a bini cu retonan. Docentenan a haci tur lo posibel pa enseñansa por a continua,” e presidente a bisa.
Pero apesar di esfuerso, e retonan pa e sector no a caba. SIMAR lo sigui vigila di cerca e trabou den enseñansa y derecho di esnan laborando eyden, y di pueblo en general.
Un aspecto importante di 2021 ta e “doorlichting” cu mester bini di sector di enseñansa. SIMAR kier claridad riba esaki. For di 15 di december e documento mester ta cla pa nan haya bista, pero no tin claridad ainda. Scolnan ta bisa cu nan no a wordo envolvi.
Un di e puntonan principal cu SIMAR ta boga p’e ta pa e peso di trabou den enseñansa mester baha. Den pasado e tabata halto y awo cu COVID el a bura mas halto. “Nos ta bisa cu ki cambio cu bini, si no baha e peso di trabou e docente no por sigui desaroya y enseñansa no por sigui innova. E docente mester di tempo pa desaroya y profesionalisa su mes. Un di e puntonan cardinal ta pa e 32 ora cu e docente ta para dilanti klas bira 27 ora. Pa e tin mas tempo pa profesionalisa su mes, cu na su turno lo yuda e calidad di enseñansa.”