E ta un lucha continuo cu SIMAR ta hiba pero awe diabierna nan ta sinti nan mes contento cu un parti di nan lucha a duna resultado y ta sigui pa Gobierno cumpli cu pago di e otro parti tambe. Un parti di e suma cu a wordo kita e luna aki di salario di maestronan, a wordo paga bek.
E luna aki e maestronan a bin descubri cu cierto suma a wordo kita for di nan salario. Ora cu a bay averigua a resulta cu tabatin un problema cu e suma di NPR WG, pero banda di esaki a resulta cu no a cumpli cu pago di e sumanan di losse uren y over uren. Mesora SIMAR a cuminsa cana e caminda necesario pero no tabata haya oido di DPS (Dienst Publieke Scholen), unda e problema a surgi. Mesora a cuminsa tuma paso, yamando reunionnan bou di oranan di trabou cu e advertencia cu esakinan por prolonga si no haya reaccion.
Diahuebs den oranan di mainta a programa dos reunion, uno na Playa y e otro na YMCA San Nicolas. E team di 24ora.com a topa cu Presidente di Sindicato di Maestronan di Aruba (SIMAR), Josephine Martilia Albertus, kende a splica cu for di dialuna ultimo nan a cuminsa haya yamadanan cu e salario cu algun maestro a ricibi no ta cuadra y no por a verifica esaki pasobra no a haya payslip e momento ey. Di biaha a pone un notificacion riba Facebook, pidiendo tur maestronan afecta cu algo asina pa tuma contacto cu e sindicato.
Despues di diferente intento a bin compronde for di Departamento di Finanza cu algo a bay fout den e MPR, pa loke ta e pago di pensioen. E splicacion ricibi ta sigui bisa cu ta trahando riba e solucion pero cu nan ta sigur cu e diferencia no por ta mas cu 100 florin, mientras cu e informacionnan cu SIMAR tabata ricibi ta bisa algo otro, pues sumanan mas grandi. Na momento cu a haya e payslip diamars a bin constata cu e problema no tabata solamente e eror den e MPR, pero nan compensacion- y “overuren” tampoco a wordo paga. Esey tabata motibo cu SIMAR a busca contacto cu DPS, ya cu ta e trahadonan ey a haya e problema. Ora cu no a haya contacto telefonico, e directiva diario a dicidi di bay e oficina. Pero e cos straño ta cu ningun hende kier a duna nan carta pa duna un splicacion.
Mirando e situacion ariba menciona, SIMAR a dicidi di pone nan pensamentonan por escrito y a duna un ultimatum pa contesta e carta te cu diaranson 4’or di atardi. E contesta cu a haya no ta cuadra cu realidad, ya cu ta papia cu a sinta cu e docentenan di SPO y a duna nan un splicacion, cual no tabata e caso. Tin un grupo a bay DPS, pero no por a haya un splicacion y a wordo bisa cu mester bay cerca director di e scol.
E problema ta cu no ta papia solamente di taak uren, pero tambe overuren. Esaki sigur, segun presidente di SIMAR, no ta husto pasobra e hendenan a traha e oranany nan tin derecho riba pago. Diahuebs mainta SIMAR a haya un mensahe di Minister di Enseñansa Rudy Lampe, kende ta den exterior, kende ta pidi despensa y cu ta reconoce e reclamo como algo husto. Pero loke cu SIMAR ta haya mas preocupante ta cu tin mas docente cu a confronta e problema aki den nan pago, pero tin miedo di bini dilanti door di intimidacion na scol. “Esaki ta algo preocupante y sin respet. Si Minister di Enseñansa mes ta bisa cu e hecho aki ta algo serio, e ora ta iresponsabel cu docentenan ta wordo intimida pa no sali bin afo riba un derecho cu nan tin. Nan a traha e oranan, nan tin derecho pa wordo paga.”
A pidi un carta cu claridad pa e docentenan, kendenan kier sa ki dia nan lo wordo paga. Inicialmente a bisa cu ta paga otro luna, pero atrobe nan no ta haya esaki husto ya cu a conta riba e placa den e pago ricibi awo. Mas si ta papia di un suma di algun shen florin. E mester ta preto riba placa pa no tin interpretacion robes.
Solucion
Diabierna den oranan di atardi SIMAR a informa su miembronan cu a cuminsa yega na solucion pa e suma cu a wordo kita di maestronan, algun ta suma chikito y otro ta sumanan mas grandi.
“Despues di dianan di incertidumbre tocante salario, SIMAR tin e placer pa anuncia, despues negociacionan cu Ministerio di Enseñansa, cu a logra pa e suma di NPR WG a wordo deposita. SIMAR ta bezig ainda tocante “overuren” y esaki tambe ta mustra hopi prometedor. Keda pendiente pa mas Informacion.”
