Diadomingo di Rama ta awe diadomingo 25 di maart 2018, e prome dia di e “Semana Santa”. Na tur misa Catolico a tuma luga celebracion special, manera ta na Misa Santa Anna na Noord.
Ey 7 or di mainta Pastor a bendiciona e ramanan prome cu e celebracion di misa, pa despues drenta paden y topa e misa completamente yen di fielnan cu a yega pa resa y pa busca nan rama bendiciona pa hiba cas, den auto y tin biaha hasta na trabou.
Papa Francisco awe na Vaticano
Hesus tabata e prome obhetivo di “Fake News”, plama e tempo aya pa esunnan cu kier a “spin & twist” su mensahe na nan mesun beneficio”, asina Papa Francisco a bisa awe Diadomingo celebrando “Diadomingo di Rama” riba St. Peter’s Square na Vaticano. Sinembargo, el a subraya cu no obstante e orguyo y sceptimismo di algun, cu asina mes nada ni ningun hende lo por stroba e alegria di e mensahe di Cristo of su resureccion.
Papa Francisco a bisa den su discurso cu: “Hesus a muri na crus, yorando su amor pa cada un di nos; jong y bieu, santo y pecadonan, pa hendenan di su tempo y esunnan di nos tempo awo”.
Papa Francisco a enfatisa den tur humildad cu, e entrada di Cristo na Jerusalem a provoca un avalancha di sentimientonan mixto y contradictorio, tin biaha incluyendo amor y odio, sacrificio propio y indiferencia; E alegria di tur esunan cu a yama Cristo bon bini, banda di e odio di tur esunan cu kier a mir’e crusifica.
Kico ta Diadomingo di Rama?
Nos tur conoce Pasco Grandi, conoci na Ingles como “Easter Sunday”, pero poco sa e berdadero nificacion di e Diadomingo di Rama of na Ingles yama “Palm Sunday”. Prome cu resureccion, Catoliconan ta corda e hecho cu a crusifica Hesus, despues el a muri y a der’e.
Diadomingo di Rama ta marca e momento den historia ora e yiu di Dios a drenta Jerusalem, mara patras di un burico, cu un multitud grandi di publico na banda. E mesun hendenan aki despues a pidi pa nan mat’e.
E nomber mes ta bini di e blachinan di mata, e palmeranan, cu pubico a benta riba caminda pa Hesus cana riba dje mara tras di e burico, drentando Jerusalem. Awendia ta uza e mesun mata aki pa simbolisa paz y victoria. Den bijbel na mas di un ocasion a uza e palmeranan aki como homenahe na un heroe conkistado. Ora el a yega publico a uza e palmeranan aki y hasta a pone paña na su pia pa homenag’e.
Prosecion
Awendia ta uza e mesun rama aki pa parti cu debotonan, cu ta carga nan den un prosecion drentando misa. Ta bendiciona e ramanan cu awa bendita. Ta traha cruz chikito cu nan, pa hiba cas. Despues ta kima nan e siguiente aña pa crea e as cu ta hunta na frenta di Catoliconan riba “As Woensdag” net despues di Carnaval, pa simbolisa inicio di e temporada di cuaresma. Na e partinan di mundo unda e matanan aki no ta crece, ta uza flow of blachi di olijf.
Otro aña
Adelantando, por informa cu Diaranson di Shinishi 2019 lo ta riba dia 6 di maart, mientras cu Diadomingo di Rama 2019 lo ta riba dia 14 di april 2019. Consecuentemente Bierna Santo lo ta dia 19 di april 2019 y Pasco Grandi lo ta diadomingo dia 21 di april 2019.
