Rocco Tjon, Minister di Husticia y Asuntonan Social ta informa cu pa loke tabata e incidente lamentabel di varios hende indocumenta cu a perde nan bida purbando di drenta nos isla ilegalmente via boto, tabatin personal y radar tabata Traha. E lama bruto ta loke a hinca e boto den problema.
Un caso sumamente lamentabel caminda un boto direccion pa Aruba a haya su mes den problema. Diferente persona a paga e prijs maximo tambe anto pa dos dia autoridadnan a keda topa curpa na lama. Esaki ta constantemente e motibo pa kico semper ta vocifera cu e pasada aki ta hopi peligroso y ta purba na un forma pro activo conseha personanan pa no hacie.
Banda di e echo cu tin diferente tecnologia ‘in place’ y presupuesto 2024 lo conoce tambe un ampliacion den nos sistema di radar. “Na final di dia, nos por intercepta esaki pero e peliger semper ta keda na esunnan cu ta bin e direccion aki.”
E caso aki awor tin atencion di Cuerpo Policial, tin diferente informacion a drenta y tin un caso penal awor andando pa por haya sa ken ta esunnan tras di e organisacion aki, pa tene nan responsabel. A puntra e mandatario kico por a bay robes den e caso aki, si tabata tin radar ta traha of personal disponibel n’e momentonan ey.
E mandatario ta bisa cu nunca ta bay den detayes pero ta confirma nos cu tabata tin personal den dienst, y radar trahando. “Simplemente e circunstancianan pa loke ta trata lama, e tempo tabata sumamente malo y p’esey tambe e boto ki a hay’e den problema.”
