For di ayera a tuma luga un serie di reunionnan den cuadro di Arubus. E trahadonan ta firme riba nan posicion. Mediado di gobierno, Anselmo Pontilius a sinta cu raad, sindicato SEPPA y minister. E partidonan no por yega na otro y ey e rol di mediado di gobierno ta importante. A palabra ayera cu lo yega na un acuerdo temporal den e situacion aki. A ked’i ricibi e proposicion pa 7:00 pm for di minister pero esaki no a sosode. E minister encarga, Ursell Arends a pidi pa mas tempo. E tempo extra tabata necesario pa e hiba e proposicion na conseho di minister pa si ta necesario ricibi mas fondo pa duna Arubus.
Pa diabierna mainta tampoco a ricibi un proposicion for di minister. Locual ta necesario awo pa benta awa den biña. E ta necesario segun mediado di gobierno, mirando cu tin un cantidad di usuario ta uza Arubus pa yega trabou. Diabierna merdia, e mediado di gobierno a sinta cu SEPPA y Minister Ursell Arends. Locual a sali for di e reunion ta pa yega na un proposicion temporal. Pakico temporal? Pronto lo ricibi e ‘doorlichting rapport’ y ey lo ricibi varios recomendacion pa cu futuro di e compania.
E berdad si ta cu; e situacion financiero di Arubus ta keda uno precario. Locual ta pendiente ta e carta di minister caminda ta garantisa e supuesto proposicion. SEPPA su posicion ta clave. A manda un carta oficial tambe pa minister informand’e cu; si no yega na solucion pronto, lo bay den un paro completo na Arubus. Pues e fin di siman aki ta uno crucial pa Arubus. Diadomingo awo, SEPPA ta reuni cu su miembronan pa dicidi riba nan protesta, sea ta reanuda trabou of ta bay den protesta 100%. Durante e reunion lo atende cu e proposicion di minister. Locual tin riba mesa: algun compensacion financiero.
