Den combersacion cu director di Censo mr.l Sharin Luydens a toca e tema tambe di KPA. Un instituto di cual un tempo e tabata forma parti di dje y cu ta wordo bisa cu e ta un di e personanan cu por bay maneha e cuerpo aki su so of den combinacion cu un team di maneho.
“Mi mes a tende for di un familiar kende a bisami cu mi nomber a of ta wordo menciona na radio pa Cuerpo Policial,” Luydens a cuminsa pa bisa.
Ta berdad, el a bisa, cu el a wordo aserca riba su pensamentonan pa cua Cuerpo Policial di Aruba, pero di un forma informal, el a enfatisa. Y esaki sigur no tabata di hendenan cu lo mester tuma e decision riba e asunto aki.
“Un cos mi por bisa y esaki ta cu mi tin masha amor pa Cuerpo Policial y e trabou aki di Polis. E no ta un trabou facil. Mi a trah’e 13 aña y semper mi lo keda desea tur cos bon pa Cuerpo Policial. Esaki mi ta bisa honestamente y di mi curason. Si mester cambia e hefe di Polis, mi ta desea cu nan por logra haya un Korpschef cu realmente tin amor pa dedica na e trabou aki.”
El a sigui bisa: “Mi a tende loke mi ta wordo puntra, pero mi tin cu bisa cu mi ta bon aki. Mi ta gusta loke mi ta haci. Na Censo mi a haya hopi conocemento di loke por wordo haci cu tecnologia y data, con por haci departamentonan di Gobierno hopi mas eficiente den intercambio di informacion. Mi ta kere cu e conocemento cu mi tin, mi lo por yuda Cuerpo Policial den esey. Mi kier nos yega na un sistema digital pa Gobierno unda e pueblo por sirbi den forma hopi mas eficiente. Esey tambe ta encera cu Cuerpo tambe por bay den un era digital, pa uza tecnologia pa haci e trabou den un forma hopi mas eficiente.”
Pa loke ta e puesto di Alto Comisario, el a bisa: “Mi no a pens’e y mi no kier duna un contesta riba esey. Mi no a wordo aserca oficialmente. Mi ta masha honra cu nan a menciona mi nomber. Mi no ta kere cu un hende mester cera su mes di yuda unda cu nan pidibo pa yuda y cu nan ta kere den e capacidad cu bo por tin.”
