Diadomingo 20 di october 2019, durante un atardi ameno na Club Don Bosco, a tuma lugar un otro evento di Comision Accion Femenino.Durante e ultimo evento a realisa un encuesta bou e publico presente, cual resultado di 25.9% a sugeri pa e siguiente evento ta encuanto “Relacion y educacion di yiu”.
Comision Accion Femenino bou di guia di Sra. Shailiny Tromp-Lee a realisa e charla di diadomingo ultimo, unda a invita e Comision Nacional cu ta encarga cu e Vision Pedagogico pa Aruba. E Comision ta consisti di e siguiente organisacionnan: Tienda di Educacion, Fundacion pa Nos Muchanan, Fundacion Respetami, Stichting Wit Gele Kruis y Departamento di Asunto Social. Meta di e Comision ta pa tur hende na Aruba y specialmente tur mayor cera conoci cu e 6 puntonan basico di e Vision Pedagogico. Esakinan ta lo siguiente:
- Lanta bo yiu den un ambiente sigur y amoroso
- Apoyo positivo, guia y pasa tempo hunto
- Sea realistico
- Disciplina positivo
- Cuida bo mes
- Busca sosten y ayudo
Aparte di un charla tocante e 6 puntonan aki, publico presente a wordo parti den grupo cu un representante di e Comision Nacional. Conhuntamente cada grupo a dialoga ariba cada un di e puntonan y a deduci, individualmente con nan ta clasifica nan mes ariba cada punto. Nos Minister President Sra. Evelyn Wever Croes, Minister di Asunto Social y Labor Sr. Glenbert Croes, Presidente di Parlamento Sr. Ady Thijsen, Presidente di Partido (MEP) Sr. Hendrik Tevreden hunto cu varios candidato di Movimento Electoral di Pueblo (MEP) tabata presente y a forma parti di e gruponan. Na final di e atardi informativo aki, cada grupo a scoge un representante di nan grupo pa duna un resumen di e puntonan principal. Mayoria tabata di opinion cu aunke tur punto tin su importancia, punto 5, cual ta “Cuida bo mes” ta bin na prome luga.
Nos yiunan ta absorba hopi door di observa nos y ta keda na cada un di nos como mayor, wela, welo, tanta, omo of ruman, pa ta den balance cu con nos ta lanta nos yiunan. Door di cuida nos mes, nos ta cuida nos yiunan, ta e ehempel y duna nan e atencion y disciplina positivo. Tuma tempo di nos dianan largo pa asina recorda nos yiunan cu nos ta stima nan y cu aunke tin dia cu mayornan por tin stress, cu esaki no mester wordo baha riba nos yiunan. Adapta na e edad di bo yiu, scoge den ki manera nan por haci bo dia uno mas relaha y un dia yena cu amor y cu cualkier situacion cu presenta su mes pafo di nos hogar, no lo kibra e relacion positivo cu nos famia y specialmente no cu nos yiunan na cas.
E atardi informativo, educacional y interactivo aki a clausura exitosamente cu un breve discurso di gradicimento di Sra. Yvonne Bermudez di Departamento di Asunto Social, Sra. Shailiny Tromp-Lee y nos Minister President Sra. Evelyn Wever Croes. Comision Accion Femenino ta gradici tur cu a asisti na e actividad aki y ta subraya un biaha mas cu lantamento di nos muchanan ta responsabilidad di nos tur. Alabes ta yama danki na e Comision encarga cu e Vision Pedagogico cu a haci e actividad aki posibel.
