Ta un berguensa cu Mike Eman, parlamentario di Pais Aruba, no por bisa pueblo unda e 916 miyon di prestamo di Hulanda durante pandemia (Covid) a bay.
Bo ta ripara cu den parlamento e no ta traha, sino e lo sa y no lo ta papia coy loco y crea sensacion. Ami lo sugeri Mike Eman pa lesa su documento- y leynan cu nos a haya of trata durante y despues di pandemia y stop di hunga di kens. Pasobra echo ta cu e sa bon bon, pero ta hunga politikeria barata.
Tristo p’e ta, cu pueblo tambe sa, pasobra ta nan a haya Fase, pa mantene e trahado na pia di trabou. E doñonan di trabou a haya subsidio di salario, pa mantene nos companianan chikito y mediano habri. Nan doñonan a haya sosten financiero y sigur no menos importante cu e placa aki a maneha e pandemia y salud di nos hendenan. Ta con nos por lubida?
Mike Eman ta un tiki laat tambe pa awor kier bin bolter cos si di 2021 pa awor e tabata den silencio, cobrando salario di parlamentario sin traha y sporadicamente a sali duna un rueda di prensa. Ta con Mike Eman por tin su isla y nos hendenan na pecho? Ban ta serio! Y pueblo no mester kere ami.
Tur hende por bay scucha kico Gerlien Croes, ora el a sali di AVP, a bisa, esta cu Mike no ta traha y ta e mester a represent’e semper y ehecuta e funcion di Lider di Fraccion di AVP. Anto esaki mientras ta Mike Eman ta cobra pa haci esaki:“Den e dos aña cu mi a fungi como lider di Fraccion di MEP nunca Mike Eman a asisti na un reunion caminda e lidernan di fraccion ta reuni. Sin papia mes di su ausencia den e reunionnan di comision y encuentro y reunionnan publico.”
Hopi tristo e nivel di politica cu Mike Eman ta keda hiba y mas tristo ainda e echo cu e ta keda haci manera cu pueblo ta bobo. Un falta di seriedad total, banda di e echo cu Mike Eman ta keda demostra cu e no por carga su responsabilidad. Esaki no ta di awor, pero desde cu e tabata prome minister di e pais aki.
Un cos ta sigur, Mike Eman a demostra un liderazgo di crea debe y problema social! E ta tremendo den gasta hasta loke nos no tin! Un berdadero experto den realisa proyecto sin indica con e ta bay paga nan! Pero ta facil pa laga e siguiente gobierno saca nan som y busca solucion, y laga pueblo paga cu orguyo.
