Siman nobo di trabou a inicia na un manera tremendo. Dialuna mainta 25 april 2022 Gobierno hunto cu SKOA a anuncia inicio di renobacion di Sint Aloysius school na Noord. Mediante di un conferencia di prensa esaki a keda oficialmente anuncia pa Minister Endy Croes cu ta Minister di Enseñansa y Deporte. Tambe a hiba palabra Minister President Evelyn Wever-Croes, directora di SKOA Anuesca Baly, cabesante di Sint Aloysius Vladimir de Cuba, arquitecto Kock y tambe miembro di Bestuur Pastor Jairo. Un mainta yena di positivismo y felicidad mirando cu tur hende ta sumamente contento cu inicio di e proyecto di renobacion y construccion di dicho school.
Manera cu tur cu a hiba palabra e mainta aki a indica, ami tambe ta feliz cu porfin ta bay inicia cu renobacion di e scol aki y cu profin e ta bay haya un gymzaal. Sint Aloysius School ta e scol basico cu mi yiunan grandi a bishita y e school y e maestronan tin un lugar special den mi curason. Desde cu mi ta den parlamento na cada ocacion a pidi atencion pa e scol aki den mi discursonan y tambe a haci preguntanan por escrito dirigi riba e proyecto specifico aki. Na mas di 1 ocasion a aproba e fondonan tambe pa e renobacion por tuma luga, lastimamente esaki no tabata keda concretisa. Porfin awor e renobacion ta bay bira un realidad. En total Gobierno a aloca 2 miyon florin pa e renobacion completo y tambe construccion di e gymlokaal. Durante e presentacion awe mainta a presenta un video di con e scol lo wordo renoba y con e lo keda.
Ami ta feliz! Pabien Aruba! Pabien na henter e famia di Sint Aloysius School, principalmente e cabesante, tur maestro y nos muchanan. Pronto nan lo ta na nan scol bek, mirando cu e proyecto lo tuma 11 luna pa realisa. Di curason mi ta spera cu e proyecto aki ta bay cana bon y nos logra tur loke ta keda premira. Exito na tur cu ta envolucra den su ehecucion.
