Lilian Prince, presidente di Koningin Wilhelmina Fonds Aruba, den un conferencia di prensa a anuncia cu e trabou di e fundacion a sigui normal den 2020, a pesar di e pandemia di COVID-19, pero cu su limitacionnan.
Aña pasa no tabatin tempo of oportunidad pa haci nan tradicional evento di recaudacion di fondo riba caya, manera nan tabata haci tur aña. Asina mes a logra cumpli cu tur e pashentnan di cancer cu a bati na porta di e fundacion.
E fundacion ta yuda cu diferente material pa uzo den bida diario di e pashentnan. Hopi biaha ta yuda e pashentnan cu transporte pa bay nan tratamento. E ta un peso pa un familiar hacie, ya cu nan mester perde ora di trabou, y consecuentemente entrada. Tambe sa yuda cu pasashi pa e di dos familiar cu mester bay compaña e pashent den exterior despues cu e prome bolbe.
Den aña 2020 a bin cu un servicio nobo di radioterapia. Pa esaki e pashentnan no mester bay den exterior mas. E ta sosode na Aruba mes y KWF ta yuda transporta nan pa IMSAN y despues pa cas.
E gastonan di aña pasa a surpasa 155 mil florin. Pa cual e aña’ki mester core campaña pa recauda fondo. Den 70 aña cu nan ta existi na Aruba, nunca mester a subi caya pa pidi fondo. Na april ta cuminsa colecta e fondonan necesario pa sigui brinda yudansa na comunidad.
SETAR a partner cu KWF pa yuda e fundacion haya fondo. Nan representante Rayra Lopes a splica cu awendia poco hende ta cana cu placa efectivo. Hopi biaha, specialmente e generacion actual, kier saca un man yuda pero no tin e placa cu nan. Awo esaki ta posibel via di e App di Setar. Ta baha esaki, si bo no tin’e, y registra bo mes. Mester link bo banco cu e app pa hinca placa den dje. Den e APP mester busca e nomber di KWF y por haci donacion un biaha, of un biaha pa luna, con cu e cliente kier.
Pronto ta bay tin un QR Code cu ta bay pone riba e blekinan di KWF cu por djis scan y mand’e via bo cuenta pa e fundacion.
