SETAR ta informa cu su Mobile Network a stabilisa pa ambos “Voice” y “Data”. Ta gradici tur cliente pa e pasenshi y comprension desde diadomingo atardi. Pa compensa tur cliente Postpaid y Hybrid lo haya descuento di dos dia (2/30) riba nan abonnement mensual actual cu ta vence 9 di october 2023. Clientenan cu a paga caba lo ricibi e descuento di dos dia (2/30) di e abonnement mensual riba e siguiente cobransa. Cliente Prepaid lo haya 3GB di data pa dia pa dos dia.”Mi ta kere cu den bida tin cu pasa den momentonan duro tambe. Awe ta un di e dianan ey, net den un habrimento di siman”, asina ir. Zenovio “Roland” Croes, director di Servicio di Telecomunicacion di Aruba (SETAR) pa 21 aña caba, a indica. El a papia cu e pueblo awe merdia, durante un entrevista den e noticiero mas scucha/mira di tur merdia, esta Enfoke. El a sali duna cara pa e situacion cu a presenta y cu, te na e momento ey, no tabatin un solucion ainda pa su 94 mil clientenan.
E director di SETAR a confirma cu desde diadomingo atardi 4:00 pm a nota un fayo den nan sistema. Prome tabata solamente cu e sistema di data pero despues a afecta tur tres red cu nan ta maneha, pues 2G, 3G y 4G. Y na momento cu 3G a cay afo, mesora a afecta yamadanan tambe, cu tur consecuencia cu esey tin pa e compania mes y inconveniencia pa e clientenan.
“Mesora ora a ripara e envergadura di e problema, a bati alarma grandi y a envolvi nos suppliernan pa yuda nos solucion’e. Ayera nos tabatin mas o menos 20 tecnico riba e caso y awe dialuna nos a habri dia cu 40 tecnico riba e caso. Nos tin colega di SETAR mes cu for di diadomingo 4:00 pm ta trahando non stop, sin drumi, pa por soluciona e fayo”, segun Roland Croes a conta durante e entrevista.
Ora cu pa mas o menos 11:00 am a pensa cu e situacion ta stabilisa, a resulta cu toch e red no por a carga tur e clientenan bek. Consecuentemente e servicio a sigui deficiente y haci yamada via whatsapp y via liña di celular no tabata bay facil. A realisa cu pa e ora ey ainda e situacion no tabata bou di control, pa cual a escala e problema pa busca un solucion cu mas urgencia.
Kico ta e motibo exacto di e fayo, no ta conoci. Roland Croes ta kere cu, probablemente, e fayo ta den “software”, loke ta haci e situacion mas complica y dificil pa yega na dje. Ta bin acerca cu e baymento di coriente constant tampoco no ta yuda. E hefe di SETAR ta mira cu asina cu coriente a bay bin, cu diripiente problemanan a presenta. Aunke ta prematuro pa bisa cu ta pa via di coriente, toch e ta mucho casualidad cu net e ora ey e problemanan a presenta.
Mientrastanto, dialuna net prome cu 6:00 pm, SETAR a informa cu e situacion ta bou control y cu tur hende por uza data y haci yamada sin problema atrobe. No a bisa finalmente kico tabata e fayo exacto cu a conduci cu pa dos dia largo tin reto cu comunicacion via SETAR. Locual si a sigura ta cu tur cliente por conta riba recompensa.
“Nos no ta nan”, asina Patrick Paskel a cataloga e forma di traha di SETAR compara cu otro compania di utilidad. “Ami no ta bisa esey”, Croes a contesta mesora cu un sonrisa. Pero si el a confirma cu SETAR ta convenci di e inconveniencia y ta recompensa bek. Esey ni WEB ni ELMAR no ta haci ora di interupcion di servicio.
Mester menciona cu e fayo interno a causa no solamente inconveniencia pa usuario individual, sino tambe clientenan comercial cu no por a maneha pago via mobile POS machines. Ainda ningun comerciante a insinua di lo demanda SETAR pa perdida di entrada door di nan fayo.
