Fin di aña ta acercando y ya nos ta den pleno dianan di fiesta y celebracion pa loke ta Pasco y pronto, Aña Nobo. Manera ya ta conoci, tur aña e temporada aki ta resulta di ta uno druk cu hopi auto riba caminda, fiesta tur caminda y demas actividad rond di nos isla. Tur esaki ta haci cu e ta un di e temporadanan mas ocupante pa loke ta servicio di polis como tambe ambulance. Den un combersacion cu hefe di servicio di ambulance, Liberato Hoek, el a splica cu manera tur aña, e ultimo simannan di december servicio di ambulance semper ta prepara pa brinda cuido medico na momento cu esaki ta necesario. Pues, por ehempel, den caso di accidente of hende ta bira malo na cas.
Compara cu e mesun temporada aki aña pasa, den e ultimo periodo aki ya a tuma nota di un aumento di 10% den e cantidad di melding cu tin, tanto pa accidente y hende cu ta bira malo na cas. Riba esaki, tambe tin e pashentnan di COVID-19 cu nan ta mester transporta y den e ultimo simannan, Hoek a señala cu esakinan a bolbe cuminsa subi.
Gran parti di e yamadanan cu ambulance ta ricibi ta di persona cu ta padece di un of otro malesa cronico, por ehempel, presion halto of diabetes. P’esaki Hoek a splica cu ta di suma importancia pa ora un persona yama 911 pa duna un bon splicacion di kico e persona ta sinti pa asina e centralista por haci un bon ‘filter’ di e yamadanan. Specialmente den e temporada aki cu tin aumento den yamada y a base di esaki e centralista por wak kico tin prioridad. Hoek a bisa cu ta tres ambulance tin den cada warda pero e por ta posibel cu tur tres ta ocupa n’e momento ey.
Pa un relato mas amplio lesa edicion di TREMPAN mañan.
