E trahadonan di Arubus N.V. a bay den protesta pa dos ora. Desde 2017 tin diferente problema y un di nan ta schalering. Desde algun dia adelanta nan a informa gerencia cu awe nan ta drenta den accion hunto cu nan sindicato SEPPA.
Magaly Brito, secretario general di SEPPA, tambe tabata presente pa asina papia cu e trahadonan. El a indica di a informa e trahadonan riba un carta cu nan a ricibi di gerencia pa pospone e accion p’un siman. E motibo cu gerencia a uza ta cu a haya invitacion di minister Arends pa un reunion. E trahadonan no ta contento cu e carta aki, pasobra ta interpreta esaki como un tactica di gana tempo.
E sindicalista kier sa kico ta bay cambia cu e reunion di diamars atardi cu e mandatario. Si nan tabata serio den nan intento pa para e accion aki, e argumento cu nan por uza ta e servicionan publico y esey ta algo cu ta compronde. Pero e trahadonan tambe tin derecho. Si nan intencion tabata pa stop e, nan por a bin cu proposicion na mesa di schalering. Asina ey e trahadonan por a evalu’e y bisa si ta dispuesto pa warda of no.
E echo ta cu a ricibi e carta awe mainta, esey no a cay na bon tera pasobra no ta di awo SEPPA a informa den nomber e trahadonan tanto gerencia como minister riba e accion p’e falta di incumplimento. Tur esaki ta bay bek n’e reunion cu tabatin dia 16 di october unda a trece diferente aspecto dilanti. Un di nan tabata cu a yega bisa cu ta luchando pa structura salarial, pero no tin placa. Ta bisa no tin placa, pero pakico.
E sindicalista sa cu nan ta den discusion riba e structura salarial y a palabra cu, Raad a pidi, un compania independiente pa bin c’un proposicion pa trece e partidonan mas cerca di otro. No a haya un resultado, esey ta significa nan no sa di ki placa ta papiando. Ni e sindicato ni e trahadonan sa si ta proponiendo un aumento di 25 florin, e ora ey no sa si ta bay cu e cantidad di trahado aki y si e placa ey ta kibra e presupuesto di Arubus di tal forma cu no por duna aumento. Nan no sa di ki forma exactamente nan ta nengando.
E otro tema ta e echo cu ainda no a keda cla entre Arubus y gobierno p’e famoso acuerdo entre ambos pa e servicio cu ta duna comunidad. Tambe cuanto pais Aruba mester paga gobierno p’e servicio di subsidio. Como cu no ta existi e acuerdo ey, e pregunta ta dicon ta tarda. Desde aña pasa ta scucha di esey, kiermen no por acepta excuus.
Pa mas lesa TREMPAN.COM.
