Diadomingo a tuma luga e wega final entre Aruba y Turks & Caicos den torneo CFU Challenge Series (Caribbean Football Union) na Republica Dominicana.
Nos damitanan a sa di demostra disciplina y determinacion pa asina tabata bon prepara y na tur momento a sa di mantene nan enfoke riba nan wega.
Na di shete minuut Aruba pa medio di un tiro di skina bon hunga, unda cu hungado di Aruba, ta kop e bala direct den gol pa asina Aruba ta bay ariba 1-0. Na di 33 minuut e seleccion a probecha cu keeper di Turks & Caicos no por a wanta e bala y anota e di dos gol pa Aruba.
Na di 65 minuut di wega, Aruba, un biaha mas riba un tiro di skina, c’un cabesaso ta score e di tres gol. Asina tambe Aruba ta gana titula campeon den CFU Challenge Series.
Esaki ta prome biaha cu Aruba ta participa den campeonato di desaroyo.
Nos muchanan a haci un bon papel y sigur a laga un bon impresion atras, unda cu faltando apenas algun minuut pa wega termina, ya caba e comentaristanan deportivo tabata laga Aruba su nomber resona y tabata nombra Aruba como campeon. Como campeon di tier 2, otro aña e seleccion U14 ta pasa pa tier 1 y aki lo topa cu e seleccionnan mas fuerte.