Diadomingo mainta, cuminsando pa 9:00 am, fundacion Mi Voz ta Bo Voz ta repartiendo tas y varios articulo pa scol na muchanan den necesidad na Piedra Plat Entertainment Center. Mas di 200 mucha a haya nan pakete y e mucha hombernan cu a bin, a haya un pela gratis for di un di e barberonan cu a pone man na nan curason y brinda e servicio aki.
Tambe Departamento di Salud Publico a haci un donacion di un paki di skeir’i djente pa cada mucha. Sigur un accion sumamente bunita di parti di e instancianan aki.
Lisette Gomes, presidente di e fundacion a comenta cu e aña aki nan a ricibi 500 inscripcion, di cual na final nan a keda cu 410 mucha. Y ainda tin varios mucha riba wachtlijst. “Nos no ta den un situacion facil. Esunnan cu por yuda, por sigui yuda cualkier famia den necesidad.” Oficialmente e fundacion ta yudando muchanan pa 2 aña caba, pero ya pa basta tempo prome nan ta haciendo e accion aki. Door di esey nan tin un database di cada famia cu ta pasando den duro.
Pa tur esunnan cu ta interesa por subi nan pagina di Facebook bao di Mi Voz ta bo Voz of tambe por tuma contacto via number 5629820. E fundacion lo haci su maximo pa yuda tur hende cu ta den necesidad.
Pa cobertura mas amplio lesa edicion di TREMPAN mañan.
