Aruba su seleccion femenino di futbol ta competi den Liga C di Road to W Gold Cup di Confederation of North, Central America and Caribbean Association Football (Concacaf). Ya caba nan a hunga dos wega, di cual nan a gana uno y perde uno.
Diamars e seleccion femenino a biaha pa Boneiro pa nan di tres y cuater encuentro. Pero, e cinco hungadonan cu tabata falta tambe a yega pa asina e seleccion ta completo.
Diaranson nan a tene nan prome training na Boneiro den stadion Antonio Trinidad na Rincon. Nan ta preparando fuerte p’e wega di diahuebs, 26 di october, como tambe esun di dia 30 di october. Ambos wega ta contra e seleccion Boneriano.
E seleccion di Aruba ta consisti di binti hungado, di cual cinco ta di Hulanda. Tin mas hungado di Hulanda cu no por a yega, pa motibo cu nan temporada a caba di inicia. E team aki tin mas o menos un aña ta train hunto, cual seleccion aki ta esun di mas hoben pa loke ta esun di dama adulto. E seleccion actual ta di dama adulto y ta conta cu hungadonan entre e edad di diescinco pa diesshete aña.
