Diaranzon atardi seleccion di Artistic Swimming a sali pa Panama unda nan lo participa na e unico competencia clasificatorio pa e Weganan Centro Americano y del Caribe Barranquilla 2018.
Mester bisa cu Aruba a biaha cu un seleccion relativamente hoben combina cu algun landado ya experencia. Nan lo competi den ekipo contra e miho paisnan den America Central y esnan den nos region, mientras cu e atletanan Van Daal, Albertsz y de Veer lo bin na remarke pa landa e competencia di duet. No obstante di e edad hoben di seleccion, nan a prepara nan mes debidamente pa e competencia aki y lo hasi nan maximo esfuerzo pa logra e obhetivo poni. Entrenadora Alva Torres lo dirigi e seleccion.
Na aña 2014 den e Weganan CAC na Veracruz, Mexico nos damitanan a logra un di 4 lugar den ekipo y a keda net pafor di e medaya di brons. Den duet si Aruba a conkista e medaya di brons danki na e duet Eman y Hoevertsz. Awor a traha riba un base nobo y nos damitanan ta cla pa demostra pakiko Aruba ta un di esnan miho den Caribe den e deporte di Artistic Swimming. Hopi exito na e seleccion di artistic swimming y ohala nan logra e clasificacion pa Barranquilla, Colombia.
Stichting Sportsubsidie Aruba ta subsidia e biahe di e delegacion di artistic swimming cu a bay un competencia clasificatorio pa e Weganan Centro Americano y Del Caribe Barranquilla, Colombia.
Cumprando weganan di Lotto, e Loteria di Aruba manera Catochi, 1-Off, Big 4, Zodiac, Wega di Number Korsou, Lotto di Dia, Lotto 5, Mini Mega cu su Mega Plus y e diferente weganan di Raspa Y Gana bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.
